کورپاڼه / ولسمشر غني له زلمي خليلزاد سره وليدل
زلمى خليلزاد او اشرف غني

ولسمشر غني له زلمي خليلزاد سره وليدل

خپلواک وېبپاڼه (٦ مارچ ٢٠٢٠): ولسمشر محمد اشرف غني د سولې پروسې د راتلونکو ګامونو په اړه د زلمي خليلزاده سره نن په ارګ کې ليدلي دي.

د ارګ له لوري په خپور شوي خبر کې ويل شوي دي، چې د افغانستان د اسلامي جمهوريت جمهور رييس محمد اشرف غني نن ماښام د افغانستان د سولې لپاره د امريکا متحدو ايالتونو د بهرنيو چارو وزارت ځانګړي استازي ډاکټر زلمي خليلزاد سره په ارګ کې وکتل.

په دغه خبر کې همدا راز زياته شوې ده، چې په دې کتنه کې دواړو لوريو د سولې پروسې د راتلونکو ګامونو او تياريو او همدا راز د طالبانو ډلې سره د افغانستان د اسلامي جمهوريت د مذاکره کوونکي ټيم د مذاکراتو پيل په اړه بحث وکړ.

د يادولو ده چې تر دې مخکې د وال سټرېټ ژورنال په خپل يو خبر کې ويلي و، چې ولسمشر غني له زلمي خليلزاد سره خپله ليدنه رد کړې ده، خو وروسته د ولسمشر غني وياند صديق صديقي ياد خبر رد کړ.

دا په داسې حال کې ده چې د امريکا او طالبانو ترمنځ په افغانستان کې د سولې راوستو تړون تر لاسليک وروسته ولسمشر غني په خپله وېنا کې ويلي دي، چې دوى پنځه زره طالب زندانيان نه خوشې کوي او د دوى د خوشې کولو لپاره خپل شرطونه لري.

همدا راز په قطر کې د طالبانو د سياسي دفتر وياند سهېل شاهين بيا په خپل يو ټويټ کې ويلي دي، چې دوى بېن الافغاني مذاکراتو ته تيار دي، خو تر هغې بايد مخکې د دوى پنځه زره زندانيان خوشې شي او که دا خوشې نه شي، نو دوى به په بېن الافغاني مذاکراتو کې ګډون ونه کړي.

خو ولسمشر غني وايي، چې د پنځه زره زندانيانو د خوشې کولو په اړه به په بېن الافغاني مذاکراتو کې بحث وشي.

دا هم ولولئ

د ویرات کوهلي سندرې انوشکا شرما ژړولې+ویډیو

په هندي رسنیو کې یوه ویډیو ډېره په تېزۍ سره لاس په لاس کېږي، چې …