کورپاڼه / ريکارډونه / ټيم ساوټي د سچن ټنډولکر د شپږيزو ريکارډ مساوي کړ
ټيم ساوټي او سچن ټنډولکر

ټيم ساوټي د سچن ټنډولکر د شپږيزو ريکارډ مساوي کړ

خپلواک وېبپاڼه – د نيوزيلینډ کرکټ ملي لوبډلې چټک توپ اچوونکي ټيم ساوټي د هندوستان پخواني لوبغاړي سچن ټنډولکر د ټيسټ کرکټ پارمېټ کې د زياتو شپږيزو وهلو ريکارډ مساوي کړ.

د سريلانکا خلاف په لومړۍ ټېسټ لوبه کې د نيوزيلېنډ چټک توپ اچوونکی ټيم ساوټي په لسم نمبر توپوهنې ته راووت. نوموړي په سريلانکايي ورو توپ اچوونکي ډاننجايا ډي سيلوا باندې شپږيزه ووهله او په دې سره يې د هندي سچن ټنډولکر د ۶۹ شپږيزو ريکارډ مساوي کړ.

ټيم ساوټي په لومړۍ پاڼۍ کې په ۱۹ توپونو باندې ۱۴ منډې جوړې کړې.

د هندوستان نامتو توپوهونکي سچن ټنډولکر په خپلو ټولو ۳۲۹ ټېسټ پاڼيو يا اننګزونو کې ۶۹ شپږيزې وهلي دي، خو ټيم ساوټي بيا په ۸۹ ټېسټ لوبو پاڼيو کې د هغه هومره شپږيزې ووهلې.

سچن ټنډولکر د کرکټ هغه نامتو توپوهونکی دی چې په درې واړه فارمېټونو کې يې تر ټولو زياتې سليزې هم وهلي دي.

د يادونې وړ ده چې په نړيوالو ټېسټ لوبو کې د زياتو شپږيزو ريکارډ بيا د نيوزيلېنډ د پخواني لوبغاړي او د کلکتې لوبډلې د اوسني روزونکي برينډن مکالم په نوم دی، چې په ۱۷۶ پاڼيو کې يې ۱۰۷ شپږيزې وهلي دي.

په يو ورځنيو نړيوالو لوبو کې بيا د پاکستان شاهد اپريدی د ډېرو شپږيزو ريکارډ په خپل نوم لري، نوموړي ۳۵۱ شپږيزې وهلي دي. همدا راز د ويسټ انډيز کريس ګيل ۳۳۱، د سريلانکا سانت جی سوريا ۲۷۰، د هند روهيت شرما ۲۳۲ او مهيندرا سنګ دهوني بيا ۲۲۹ شپږيزې وهلي دي.

همدا راز که د شل اوريزو نړيوالو لوبو خبره وشي، نو په دغه لوبو کې بيا د هند روهيت شرما تر ټولو زياتې شپږيزې وهلي دي، نوموړی د ۱۰۷ شپږيزو ريکارډ په خپل نوم لري. له ده پرته بيا د ويسټ انډيز کريس ګيل ۱۰۵ او د نيوزيلېنډ مارټين ګوپټيل ۱۰۳ شپږيزې وهلي او تر نورو ټولو لوبغاړو مخکښ دي.

Loading...

دا هم ولولئ

نور احمد لکڼوال

نور احمد لکڼوال په بيګ باش ليګ کې تاريخ جوړ کړ

د افغانستان کم عمره لوبغاړى نور احمد لکڼوال چې نن يې په بيګ باش ليګ …