کورپاڼه / کرکټ / ثقلېن مشتاق: د ١٩٩٩ نړيوال جام پر مهال مې خپله ښځه په المارۍ کې پټه ساتلې وه
ثقلېن مشتاق

ثقلېن مشتاق: د ١٩٩٩ نړيوال جام پر مهال مې خپله ښځه په المارۍ کې پټه ساتلې وه

د پاکستان کرکټ ملي لوبډلې پخوانى توپ اچونکى ثقلېن مشتاق وايي، چې د ١٩٩٩ کال نړيوال جام پر مهال يې خپله مېرمن د هوټل د کوټې په المارۍ کې پټه ساتلې وه.

ثقلېن مشتاق په خپله يوه وروستيو مرکه کې وويل، چې د ١٩٩٩ نړيوال جام پر مهال کرکټ بورډ پرېکړه وکړه چې له لوبغاړو سره به يې ښځې يو ځاى نه وي، نو له هغه سره د دغه نړيوال جام پر مهال خپله ښځه د هوټل په کوټه کې وه او هغه يې په المارۍ کې پټه ساتلې وه.

د انسټاګرام په لايف ويډيو کې د رونق کپور سره په خپلو خبرو کې ثقلېن مشتاق وويل، چې هغه د ١٩٩٨ کال د دسمبر په مياشت کې واده کړى و او مېرمن يې هم د لندن اوسېدونکې وه، هغه وايي چې د پاکستان کرکټ بورډ پرېکړه وکړه چې له لوبغاړو سره به يې مېرمنې په هوټل کې نه پاتې کېږي، خو زما دا پرېکړه بېخي خوښه نه شوه او د ټول نړيوال جام پر مهال مې راسره مېرمن په خپله کوټه کې وه.

ثقلېن مشتاق وايي، کرکټ بورډ د دې خبرې لپاره، چې کوم لوبغاړي سره يې مېرمنې په کوټو کې نه وي، جاسوسان هم پرېښي و، تر څو د لوبغاړو کوټې وګوري، چې څه کوي او څوک خو ورسره شته نه.

هغه وويل، کله چې به هم منېجر يا بل کوم لوبغاړى د هغه کوټې ته ورغى، نو هغه به خپله مېرمن په المارۍ کې پټه کړړه.

ثقلېن مشتاق وايي،چې يوه ورځ اظهر محمود او يوسف د هغه کوټې ته ورغلل تر څو په دې اړه ورسره خبرې وکړي، هغوى دواړو واده نه و کړى او شک يې و چې زما مېرمن زما په کوټه کې ده، د هغوى په ډېره غوښتنه ما خپلې مېرمنې ته غږ وکړ چې له المارۍ څخه راووځي، هغه له ډېر وخت څخه په المارۍ کې پټه وه.

د يادولو وړ ده چې د پاکستان کرکټ ملي لوبډلې پخوانى توپ اچونکى ٤٣ کلن ثقلېن مشتاق د (دوسرا) توپ بنسټګر هم دى، هغه د پاکستان لپاره ٤٩ ټېسټ او ١٦٩ يو ورځنۍ لوبې ترسره کړې دي او ٢٨٨ ويکټې يې ترلاسه کړي.

دا هم ولولئ

میتیو هیډن پر اسټرالیایي لوبغاړو سختې نېوکې کړي دي

میتیو هیډن د پاکستان د سفر پر مهال د اسټرالیا کرکټ لوبډلې د یوه ورځنیو …