کورپاڼه / کرکټ / ضيا الحق امرخېل: خوشحاله يم چې د کرکټ بورډ مشرانو غوره ګامونه پورته کړي
ضيا الحق امرخېل

ضيا الحق امرخېل: خوشحاله يم چې د کرکټ بورډ مشرانو غوره ګامونه پورته کړي

د افغانستان کرکټ بورډ د بورډ غړو په ناسته کې په پارلماني چارو کې د دولت وزير او د کرکټ بورډ غړي ضيا الحق امرخېل ويلي دي، چې هغه خوشحاله دى چې د کرکټ بورډ مشرتابه د کرکټ د پرمختګ لپاره غوره ګامونه پورته کړي دي.

تېره ورځ په افغانستان کرکټ بورډ کې د بورډ غړو ناسته ترسره شوه، چې د تېرې مياشتينۍ غونډې د مواردو پر تعقيب، د نوو پلانونو او پرېکړو په اړه ټول معلومات پکې شريک شو.

د افغانستان کرکټ بورډ په وېنا، په دغه ناسته کې لاندې مواردو باندې بحث وشو:

د تېرې میاشتنې ناستې په تعقیب سره د ادارې لپاره د سټراټېژیک یا اوږدمهاله پلان د جوړېدو بحث مطرح شو چې دغه پرېکړه د کرکټ له نړیوالې شورا سره هم شریکه شوې او د یادې شورا هوکړه هم پکې اخیستل شوې چې د بورډ د ټولو غړو د پرېکړې پر بنسټ د دغې چارې لپاره باید یو په کار پوه کس استخدام شي، ترڅو د ادارې لپاره یو اوږدمهاله پلان او مسیر موجود واوسي او ادارې مشرتابه په ادلون او بدلون سره په موخو او تګلاره کې کوم بدلون رانشي او پر بنسټ یې یوازې د کرکټ پرمختیا ته کار وشي.

په تدریج سره د افغانستان کرکټ بورډ ادارې زونونو ته خپلواکه بڼه ورکول او اداره به دغه کار ګام په ګام ترسره کړي، ترڅو د زونونو د پرمختګ لپاره هم غوره ګامونه پورته شي.

د کرکټ بورډ د غړو ناسته

همدارنګه د بورډ محترمو غړو ته د تېرو شپږو میاشتو مالي راپور هم وړاندې شو چې پر بنسټ یې له پلان سره سم د تېرو شپږو میاشتو په ترڅ کې په اوسط ډول سره ۷۴ سلنه بودیجه په ښه توګه لګول شوې ده او دغه راز ۹۰ سلنه عواید ترلاسه شوي دي.

د افغانستان کرکټ بورډ پر بنسټ لیک یا اساسنامه او تشکیل (جوړښت) هم د بورډ د محترمو غړو له لوري د نظرونو تبادله وشوه چې د لا ډېر ښه والي لپاره یې سپارښتنې او نظرونه شریک شول چې له نهايي کېدو وروسته به په راتلونکې میاشتنۍ ناسته کې د بورډ محترمو غړو ته د منظورۍ لپاره وړاندې شي.

د مالیې محترم وزارت ته د یوې طرحې وړاندې کول، ترڅو د کورونا له امله له ادارې سره په مالي برخه کې همکاري وشي چې ټولو غړو پرې د تایید رایه ورکړه.

د افغانستان کرکټ بورډ او یو شمېر وزارتونو ترمنځ د همکاریو د تړون لاسلیک چې پر بنسټ به یې د افغانستان کرکټ بورډ ادارې او وزارتونو ته ګټه رسیږي چې د بورډ غړو د ګډې پرېکړې پر بنسټ، دغه پلان به لومړی د جلالتمآب ولسمشر له لوري تایید او د جلالتمآب د حکم پر بنسټ له وزارتونو سره شریک شي.

د بورډ له محترمو غړو سره دغه راز د زېربنایي پروژو، د یو-میاشتني تمریناتي کمپ، د مالي ملاتړ او شپږیزې کرکټ لیګ په تړاو هم هر اړخیزه معلومات شریک شول چې د بورډ محترمو غړو یې ډېره ستاینه وکړه او د هېوادوالو د خوښیو لپاره یې ورته کارونه ډېر اړین وبلل.

له ملي راډیو ټلویزیون سره د لوبو د خپراوي په برخه کې د اوږدمهاله قرارداد پر لاسلیکولو هم خبرې وشوې، چې د بورډ محترمو غړو په وینا، دغه کار به ډېره موثره او اغېزناکه پایله ولري، ځکه دواړه ملي ادارې دي او دواړه لوري ترې برخمن کېږي.

د دغه غونډې په پاى کې بيا په پارلماني چارو کې د دولت وزير او د بورډ غړي ضيا الحق امرخېل په خپلو خبرو کې وويل، چې ډېر د خوښۍ ځاى دى چې د غوره مديريت، د لا ډېرې روڼتيا او په ښه توګه د کارونو ترسره کولو په برخه کې د افغانستان کرکټ بورډ مشرتابه تراوسه غوره ګامونه پورته کړي دي او د بورډ د غړي په توګه ترې ډېر خوشحاله يم، چې همدا رنګه په نورو هغو ټولو چارو کې چې هېوادوال پرې خوشحالېږي، بايد ورته ګامونه پورته شي.

Loading...

ليکوال\خبريال: خپلواک

Avatar

دا هم ولولئ

رحمان الله ګربز

رحمان الله ګربز: د روان شپږيزه ليګ اتلولي به په خپل نوم کړو

په شپږيزه کرکټ ليګ کې د کابل بازانو لوبډلې لوبډلمشر، ځوان او چټک توپوهونکى او …