کورپاڼه / کرکټ / د محمد نبي قرارداد بېرته الف کټګورۍ ته بدل شو
محمد نبي

د محمد نبي قرارداد بېرته الف کټګورۍ ته بدل شو

د افغانستان کرکټ بورډ له لوري سږکال محمد نبي سره په ب کټګورۍ کې قرارداد شوى و، خو اوس د کرکټ بورډ عمومي رييس فرهان يوسفزي د هغه قرارداد بېرته الف کټګورۍ ته واړاوه.

کرکټ بورډ که څه هم له لوبغاړو سره د قراردادونو په اړه معلومات نه دي خپاره کړي، خو ځينې سرچينو څو ورځې مخکې وويل، چې محمد نبي له فرهان يوسفزي او لطف الله ستانکزي سره په دې اړه ليدلي و او ورته يې ويلي و چې د هغه قرارداد دې له ب څخه الف کټګورۍ ته واړوي.

په الف کټګورۍ کې بيا اصغر افغان، راشد خان او مجيب الرحمان شامل و او په ب کټګورۍ کې د محمد نبي په ګډون يو شمېر نور لوبغاړي شامل و.

ځينو سرچينو وويل، چې محمد نبي په دې تړاو د کرکټ بورډ عملياتي منېجر او همدا اجراييه رييس سره شخړه هم کړې وه او ورته يې ويلي و، که د هغه قرارداد يې الف کټګورۍ ته بدل نه کړ، نو هغه به په شپږيزه کرکټ ليګ کې ګډون ونه کړي.

تازه يو شمېر سرچينې وايي، چې د کرکټ بورډ عمومي رييس د محمد نبي خبره ومنله او د هغه قرارداد يې بېرته الف کټګورۍ ته بدل کړو. په الف کټګورۍ کې لوبغاړو ته ٣٥٠٠ ډالر د مياشتې معاش ورکول کېږي.

ځينو سرچينو دا هم ويلي و، چې محمد نبي له الف کټګورۍ څخه ب کټګورۍ ته د کرکټ بورډ اجراييه رييس بدل کړى و، چې اوس فرهان يوسفزي بېرته الف کټګورۍ ته بدل کړ.

د يادولو وړ ده چې يو شمېر سرچينې دا هم وايي، چې د کرکټ بورډ اجراييه رييس لطف الله ستانکزى له خپلې دندې ګوښه شوى دى او د هغه پر ځاى بل کس د ارګ له لوري کرکټ بورډ ته معرفي شوى دى، چې ښايي په راروانه اونۍ کې په رسمي ډول لطف الله ستانکزى رخصت او نوى اجراييه رييس معرفي شيي.

دا هم ولولئ

د پاکستان او زمبابوې ترمنځ د دویمې ټیسټ لوبې لومړۍ ورځ پای ته ورسیده

د پاکستان او زمبابوې ترمنځ د دویمې ټیسټ لوبې لومړۍ ورځ پای ته ورسیده او …