کورپاڼه / کرکټ / نوين کومه ويکټ ترلاسه نه کړه، خو لوبډله يې بريالۍ شوه
نوين الحق

نوين کومه ويکټ ترلاسه نه کړه، خو لوبډله يې بريالۍ شوه

د کارابين پريمئير ليګ (سي پي ايل) څلورمه لوبه کې نوين الحق کومه ويکټ ترلاسه نه کړه، خو د هغه لوبډلې د ٣ ويکټو په توپير بريا خپله کړه.

دا لوبه د سينټ کيټس اېنډ نيويس پېټريوټس او ګيانا امازون واريرز ترمنځ ترسره شوه. په پيل کې پچه واريرز وګټله او پېټريوټس ته يې د توپوهنې بلنه ورکړه.

پېټريوټس په ټاکلو ٢٠ اورونو کې د ٨ لوبغاړو په سوځېدو ١٢٧ منډې وکړې، چې له ډلې يې ايون ليويس ٣٠ او بين ډنک ٢٩ منډې وکړې.

د واريرز له لوري کيمو پاول په زړه پورې توپ اچونه ترسره کړه، چې په ٤ اورونو کې يې ١٩ منډې ورکړې او ٤ لوبغاړي يې وسوځول، همدا راز عمران طاهر ٢ او کرس ګرين ١ ويکټ واخيسته. نوين الحق هم ٤ اورونه ترسره کړل او ٣٠ منډې يې ورکړې، خو کومه ويکټ يې ترلاسه نه کړه.

د ١٢٨ منډو هدف د ګيانا امازون واريرز لوبډلې په ١٧ اورونو کې د ٧ لوبغاړو په سوځېدو پوره کړ او د ٣ ويکټو په توپير يې بريا خپله کړه.

د دوى له لوري شيمرون هيټماير په زړه پورې توپوهنه ترسره کړه چې په ٤٤ توپونو يې ٧١ منډې ترلاسه کړې، نوموړي ٣ شپږيزې او ٨ څلوريزې هم ووهلې. په نورو لوبغاړو کې چندرپال همراج ١٩ منډې وکړې.

د پېټريوټس له لوري رياد ايمرټ ٣، شيلډون کوټريل او ډومينيک ډرېکس ١-١ ويکټ واخيستې.

د لوبې د غوره لوبغاړي جايزه کيمو پاول ترلاسه کړه، چې نوموړي د ١٩ منډو په بدل کې ٤ لوبغاړي سوځولي و.

د يادولو وړ ده چې پنځمه لوبه د بارباډوس ټريډينټس او سينټ لوسيه زوکس ترمنځ ترسره کېږي، چې په ټريډينټس کې راشد خان او په زوکس کې محمد نبي، نجيب الله ځدراڼ او ظاهر خان لوبېږي.

Loading...

ليکوال\خبريال: خپلواک

Avatar

دا هم ولولئ

رحمان الله ګربز

رحمان الله ګربز: د روان شپږيزه ليګ اتلولي به په خپل نوم کړو

په شپږيزه کرکټ ليګ کې د کابل بازانو لوبډلې لوبډلمشر، ځوان او چټک توپوهونکى او …