کورپاڼه / د لوبو راپورونه / انګلستان په لومړۍ شل اوريزه لوبه کې اسټراليا ماته کړه
انګلستان او اسټراليا

انګلستان په لومړۍ شل اوريزه لوبه کې اسټراليا ماته کړه

د انګلستان او اسټراليا ترمنځ په لومړۍ نړيواله شل اوريزه لوبه کې انګلستان د ٢ منډو په توپير بريا خپله کړه او په لوبلړۍ کې يې مخکېوالى ترلاسه کړ.

دا لوبه چې بېګاه په ساوتهمپټن کې ترسره شوه، اسټراليا د لوبې پچه وګټله او توپ اچونه يې غوره کړه.

انګلستان په ټاکلو ٢٠ اورونو کې د ٧ لوبغاړو په سوځېدو ١٦٢ منډې ترلاسه کړې، چې ډيويډ ملن ٦٦ او جاس بټلر ٤٤ منډې وکړې.

د اسټراليا له لوري اشټون اګر، ګلين مېکسويل او کېن ريچارډسن ٢-٢ او پاټ کومنز ١ ويکټ واخيستې.

د ١٦٣ منډو د هدف په تعقيب کې د اسټراليا لوبډلې په ټاکلو ٢٠ اورونو کې د ٦ لوبغاړو په سوځېدو ١٦٠ منډې وکړې او تر يوې زبردستې لوبې وروسته يې يوازې د ٢ منډو په توپير له انګلستان څخه لوبه وبايلله.

د اسټراليا له لوري ډيويډ وارنر ٥٨، لوبډلمشر ارون فنچ ٤٦ او مارکوس سټوينيس ٢٣ ناسوځېدلې منډې وکړې.

د انګلستان له لوري جوفرا ارچر او عادل رشيد ٢-٢ او مارک ووډ ١ ويکټ واخيستې.

د لوبې د غوره لوبغاړي جايزه ډيويډ ملن ته ورکړل شوه، چې نوموړي د ٣ شپږيزو او ٥ څلوريزو په مټ په ٤٣ توپونو ٦٦ منډې ترلاسه کړې وې او د انګلستان په بريا کې يې مهمه ونډه لرلې وه.

د ٣ نړيوالو شل اوريزو لوبو په لومړۍ لوبې کې د بريا ترلاسه کولو سره انګلستان د ١-٠ سره په لوبلړۍ کې مخکېوالى ترلاسه کړ. د دې لوبلړۍ دويمه نړيواله شل اوريزه لوبه به په ساوتهمپټن کې د سپتمبر په ٦مه نېټه ماښام ٥:٤٥ بجې ترسره شي.

د يادولو وړ ده چې د درې نړيوالو شل اوريزو لوبو څخه وروسته انګلستان او اسټراليا د درې نړيوالو يو ورځنيو لوبو لوبلړۍ هم لري.

د کورونا تر يو څه حده کنټرول وروسته انګلستان دا څلورم ځل دى چې د لوبډلو کوربه توب کوي او په پرلپسې ډول يې سيالۍ پيل کړي دي، چې لومړى يې ويسټ انډيز، بيا ايرلېنډ، ورپسې پاکستان او اوس له اسټراليا سره سيالۍ ترسره کوي.

Loading...

ليکوال\خبريال: خپلواک

Avatar

دا هم ولولئ

ډي کوک او ايشان کشن

ممبۍ انډينز د چيناى سوپر کنګز لوبډلې ته ستره ماتې ورکړه

د ټرينټ بولټ زبردسته توپ اچونه او د ايشان کشن او کوانټين ډي کوک د …