کورپاڼه / تجارتي ليګونه / اى پي ايل: چيناى سوپر کنګز لوبډلې په بريا پيل وکړ

اى پي ايل: چيناى سوپر کنګز لوبډلې په بريا پيل وکړ

د هند تجارتي ليګ (اى پي ايل) په لومړۍ لوبه کې د چيناى سوپر کنګز لوبډلې د ممبۍ انډينز لوبډلې له لوري ورکړل شوى هدف په وروستي اور کې پوره کړ او په بريا سره يې پيل وکړ.

د ١٦٣ منډو هدف په تعقيب کې که څه هم د چيناى سوپر کنګز لوبډلې د پيل توپوهونکي مرالي ويجى په ١ او شين واټسن په ٤ منډو وسوځېدل، خو له هغه وروسته فاف ډوپليسي او امباتي رايډو په زړه پورې توپوهنه ترسره کړه د ١١٥ منډو ملګرتيا يې وکړه، چې د چيناى يې بريا ته نږدې کړ.

په روان ليګ کې امباټي رايډو لومړنى توپوهونکى و چې پنځوسيزه يې ووهله او فاف ډوپليسي بيا دويم توپوهونکى شو چې پنځوسيزه يې ووهله.

ياد هدف چيناى لوبډلې په ١٩.٢ اورونو کې د ٥ لوبغاړو په سوځېدو پوره کړ او د ٥ ويکټو په توپير يې په اى پي ايل کې خپل سفر په بريا سره پيل کړ.

د دوى له لوري امباتي رايډو ٧١، فاف ډوپليسي ٥٥ ناسوځېدلې او سام کران ١٨ منډې ترلاسه کړې.

د ممبۍ انډينز له لوري ټرينټ بولټ، جېمز پيټينسن، جسپريت بومرا، هارديک پانډيا او راهول چاهار ١-١ ويکټ واخيستې.

د لوبې د غوره لوبغاړي جايزه سام کران ته ورکړل شوه.

د ممبۍ انډينز د پاڼۍ راپور:

ممبۍ انډينز

د هند تجارتي ليګ (اى پي ايل) په لومړۍ لوبه کې د پچې تر ګټلو وروسته چيناى سوپر کنګز د ممبۍ انډينز لوبډلې ته د توپوهنې بلنه ورکړه.

د ممبۍ انډينز توپوهونکو که څه هم په پيل کې چټکه توپوهنه پيل کړه، خو د روهيت شرما او کوانټين ډي کوک تر اوټ کېدو وروسته يې توپوهنه يو څه ورو شوه.

ممبۍ انډينز په ټاکلو ٢٠ اورونو کې د ٩ لوبغاړو په سوځېدو ١٦٢ منډې وکړې، چې له ډلې يې سورب تيواري ٤٢، کوانټين ډي کوک ٣٣، کيرون پولارډ ١٨، سوريا کمار يادو ١٧ او روهيت شرما ١٢ منډې وکړې.

د چيناى سوپر کنګز له لوري بيا لونګي ګيدي ٣، ديپک چاهار او رويندرا جډيجا ٢-٢، سم کران او پيوش چاوله ١-١ ويکټ واخيستې.

د لوبې د پيل راپور:

مهيندرا سينګ دهوني او روهيت شرما

د هند تجارتي ليګ (اى پي ايل) سيالۍ بالاخره هم تر ډېر انتظار وروسته پيل شوې. د اى پي ايل په لومړۍ لوبه کې د چيناى سوپر کنګز او ممبۍ انډينز لوبډلې مېدان ته کوزې شوې دي.

د لوبې له پيل څخه مخکې د لوبې پچه د چيناى سوپر کنګز لوبډلمشر مهيندرا سينګ دهوني وګټله او لومړى يې د تېر کال اتلې لوبډلې ممبۍ انډينز لوبډلې ته د توپوهنې بلنه ورکړه.

د ممبۍ انډينز ١١ کسيز نوملړ:

روهيت شرما (لوبډلمشر)، کوانټين ډي کوک (ويکټ ساتونکى)، سوريا کمار يادو، سورب تيواري، کيرون پولارډ، هارديک پانډيا، کرونال پانډيا، جېمز پيټينسن، راهول چاهار، ټرينټ بولټ او جسپريت بومرا.

د چيناى سوپر کنګز ١١ کسيز نوملړ:

شين واټسن، مرالي ويجى، فاف ډوپليسي، امباتي رياډو، مهيندرا سينګ دهوني (لوبډلمشر او ويکټ ساتونکى)، کيدار جادو، رويندرا جډيجا، پيوش چاوله، ديپک چاهار، سام کران او لونګي نګيډي.

دا هم ولولئ

سریلانکا لومړۍ شل اوریزه لوبه هند ته وبایلله

د هند او سریلانکا ترمنځ د درېیو نړیوالو شل اوریزو لوبو په لومړۍ لوبه کې …