کورپاڼه / تجارتي ليګونه / د ډوپليسي او واټسن زبردسته توپوهنه، د پنجاب په توپ اچونکو يې سرونه وګرځول، چيناى ستره بريا خپله کړه
فاف ډوپليسي او شين واټسن

د ډوپليسي او واټسن زبردسته توپوهنه، د پنجاب په توپ اچونکو يې سرونه وګرځول، چيناى ستره بريا خپله کړه

د چيناى سوپر کنګز له لوري فاف ډوپليسي او شين واټسن په زړه پورې او خوندوره توپ اچونه ترسره کړه، چې چيناى ته يې د ١٠ ويکټو په ستر توپير بريا ورپه برخه کړه او پنجاب يې له سترې ماتې سره مخ کړ.

د هند تجارتي ليګ يا اى پي ايل ١٨مه لوبه د دوبۍ په نړيوال کرکټ لوبغالي کې د کنګز اليون پنجاب او چيناى سوپر کنګز لوبډلو ترمنځ ترسره شوه.

د لوبې په پيل کې کنګز اليون پنجاب لوبډلې پچه وګټله او لومړى يې توپوهنه غوره کړه.

د کنګز اليون پنجاب لوبډلې له لوري کى ايل راهول او ماينک اګروال توپوهنې ته راووتل، چې د ٦١ منډو ملګرتيا يې وکړه، ماينک اګروال د ٢٦ منډو جوړولو وروسته د چاوله په توپ کران کېچ کړ.

د راهول سره منديپ سينګ هم د ٢٧ منډو ملګرتيا وکړه او د جډيجا په توپ د رياډو له لوري کېچ او له مېدانه بهر شو. ورپسې نيکولاس پوران توپوهنې ته راغى چې د ٣٣ منډو ملګرتيا يې ترسره کړه، هغه ٣ شپږيزې هم ووهلې او په ١٧ توپونو يې دا منډې ترلاسه کړې، چې د ټاکر په توپ جډيجا کېچ او پويلين ته ولېږه.

وروستى توپوهونکى کى ايل راهول و چې تر ټولو زياتې منډې يې وکړې او وسوځېده، هغه ٦٣ منډې کړې وې چې د ټاکر په توپ دهوني کېچ کړ.

کى ايل راهول

همدا راز ګلين ميکسويل ١١ ناسوحېدلې او سرفراز خان ١٤ ناسوځېدلې منډې وکړې.

کنګز اليون پنجاب لوبډلې په ټاکلو ٢٠ اورونو کې د ٤ لوبغاړو په سوځېدو ١٧٨ منډې وکړې، چې د چيناى سوپر کنګز لوبډلې ته يې د ١٧٩ منډو هدف وټاکه.

د چيناى سوپر کنګز لوبډلې له لوري شردل ټاکر ٢، رويندرا جډيجا او پيوش چاوله ١-١ ويکټ واخيستې.

د ١٧٩ منډو هدف په تعقيب د چيناى سوپر کنګز لوبډلې له لوري فاف ډوپليسي او شين واټسن توپوهنې ته راووتل او نن يې د چيناى لپاره د خپلې توپوهنې کمال ښکاره کړه.

دواړه د پنجاب په توپ اچونکو سرونه وګرځول او تر پاى پورې د پنجاب توپ اچونکي ونه توانېدل چې کومه ويکټ ترلاسه کړي، دواړو د ١٨١ منډو ملګرتيا وکړه او چيناى ته يې ستره بريا ور په برخه کړه.

فاف ډوپليسي د ١ شپږيزې او ١١ څلوريزو په مټ په ٥٣ توپونو ٨٧ او شين واټسن د ٣ شپږيزو او ١١ څلوريزو په مټ په ٥٣ توپونو ٨٣ منډې ترلاسه کړې، چيناى د ١٠ ويکټو په ستر توپير پنجاب ته ماتې ورکړه.

فاف ډوپليسي او شين واټسن ١

دا د اى پي ايل په تاريخ کې دويم ستر هدف و، چې د کوم لوبغاړي سوځېدو پرته د چيناى لوبډلې پوره کړ.

د کنګز اليون پنجاب له لوري نن شيلډون کوټريل، محمد شامي، کرس جورډن او روي بشنويي ټول د کومې ويکټې په ترلاسه کولو کې ناکامه شو، تر ټولو زياتې منډې بيا کرس جورډن ورکړې، چې په ٣ اوروو کې يې ٤٢ منډې ورکړې.

د لوبې د غوره لوبغاړي جايزه شين واټسن ته ورکړل شوه.

د يادولو وړ ده چې د کنګز اليون پنجاب پنځمه لوبه ده، خو تراوسه پورې مجيب الرحمان ته په کومه لوبه کې د لوبېدو چانس نه دى ورکړل شوى.

دا د چيناى سوپر کنګز لوبډلې پنځمه لوبه وه، چې دويمه بريا يې خپله کړه او د ٤ نومرو سره ٦م مقام ته لاړه، همدا راز کنګز اليون پنجاب لوبډلې بيا په خپله پنځمه لوبه کې څلورمه ماتې وخوړه او د جدول وروستۍ لوبډله ده، پنجاب تر ټولو زياتې ماتې خوړلې دي.

سبا د اکتوبر په ٥مه نېټه يوه لوبه ترسره کېږي، د اى پي ايل ١٩مه لوبه د رايل چېلنجرز بېنګلور او ډيلي کاپيټلز لوبډلو ترمنځ د دوبۍ په نړيوال کرکټ لوبغالي کې ترسره کېږي، چې د افغانستان په وخت ٦:٣٠ بجې به پيل شي.

دا هم ولولئ

سریلانکا لومړۍ شل اوریزه لوبه هند ته وبایلله

د هند او سریلانکا ترمنځ د درېیو نړیوالو شل اوریزو لوبو په لومړۍ لوبه کې …