کورپاڼه / خبرونه / کرکټ بورډ د ښځو لوبډله د تمريناتو لپاره بهر ته لېږي
د افغانستان ښځينه لوبډله

کرکټ بورډ د ښځو لوبډله د تمريناتو لپاره بهر ته لېږي

د افغانستان کرکټ بورډ د ښځينه ملي لوبډلې لپاره ٢٥ لوبغاړې له بېلا بېلو ولايتونو څخه غوره کړي دي، چې دوى ته به لومړى قرارداد ورکړل شي او له هغه وروسته به د نورو تمريناتو لپاره بهر ته ولېږل شي.

د افغانستان کرکټ بورډ له لوري په يوه خپره شوې خبرپاڼه کې ويل شوي دي، چې کرکټ بورډ د بېلا بېلو ولايتونو څخه د ٤٠ ښځينه لوبغاړو لپاره په کابل کې تمريناتي کمپ پيل کړى و، چې د ياد تمريناتي کمپ څخه وروسته يې ٢٥ لوبغاړې غوره شوې، چې د کرکټ بورډ له لوري به ورته قرارداد ورکړل شي.

په خبرپاڼه کې راغلي دي، چې ياد تمريناتي کمپ چې د ټولو اسلامي ارزښتونو په پام کې نيولو سره د تېرې اکتوبر مياشتې په ١٧مه نېټه پيل شوى و، نن پاى ته ورسېد، چې په ترڅ کې يې د لوبغاړو پر توپوهنې، توپ اچونې او توپ نيونې هر اړخيز کار وشو.

کرکټ بورډ وايي، چې د کرکټ نړيوالې شورا (اى سي سي) د اصولو له مخې بايد افغانستان هم ښځينه لوبډله ولري، په همدې خاطر کرکټ بورډ هم دا وپتيېله چې ((د ټولو اسلامي او د هېواد کلتوري ارزښتونو ته په پام سره ښځينه کرکټ ملي لوبډله رامنځته کړي.))

د کرکټ بورډ له لوري په خپره شوې خبرپاڼه کې همدا راز زياته شوې: ((همدارنګه اداره په پام کې لري، ترڅو يادې لوبډلې ته په نږدې راتلونکي کې د اسلامي هېوادونو له منځه په يوه هېواد کې د ښځینه روزونکو تر روزنې لاندې روزنیر او تمریناتي کمپ هم چمتو کړي.))

په خبرپاڼه کې زياته شوې: ((د يادولو وړ ده چې د‌ ښځينه لوبډلې د رامنځته او چمتو کېدو وروسته به د‌ کرکټ نړيواله شورا افغان لوبډلې ته د ورته کچې له لوبډلو سره سيالۍ او لوبلړۍ هم پيلوي.))

د يادولو وړ ده چې د افغانستان کرکټ بورډ له لوري د ښځو ملي لوبډلې له جوړولو سره ډېرى خلکو مخالفت ښکاره کړى دى، چې په دې لړ کې د کرکټ بورډ تخنيکي سلاکار تاج ملک عالم هم په فېسبوک کې يو پوسټ کړى و او له کرکټ بورډ او اى سي سي څخه يې غوښتنه کړې وه، چې زموږ مذهبي او کلتوري ارزښتونو ته دې درناوى وکړي او د ښځينه لوبډلې له جوړولو څخه دې تېر شي.

Loading...

دا هم ولولئ

مجيب الرحمان او اکشر پټيل

مجيب الرحمان هم د اکشر پټيل د توپ اچونې ستاينه وکړه

د هند کرکټ ملي لوبډلې توپ اچونکي اکشر پټيل د انګلستان پر وړاندې په دريمه …