کورپاڼه / خبرونه / د ښځينه ټي ٢٠ چېلنج سياليو اتلولي ټرايل بلېزر وګټله
ښځينه ټي ٢٠ چېلنج سيالۍ

د ښځينه ټي ٢٠ چېلنج سياليو اتلولي ټرايل بلېزر وګټله

د ښځينه ټي ٢٠ چېلنج سياليو په پايلوبه کې د ټرايل بلېزر لوبډلې د ١٦ منډو په توپير د سوپر نواس لوبډلې ته ماتې ورکړه او اتلولي يې په خپل نوم کړه.

د ښځينه ټي ٢٠ چېلنج سياليو پايلوبه پرون د ټرايل بلېزر او سوپر نواس لوبډلو ترمنځ په شارجه کرکټ لوبغالي کې ترسره شوه.

په پيل کې د لوبې پچه سوپر نواس لوبډلې وګټله او ټرايل بلېزر ته يې د توپوهنې بلنه ورکړه.

ټرايل بلېزر په ټاکلو ٢٠ اورونو کې د ٨ لوبغاړو په سوځېدو ١١٨ منډې وکړې، چې له ډلې يې لوبډلمشرې سمرتي مندانا په زړه پورې توپوهنه ترسره کړه چې د ٣ شپږيزو او ٥ څلوريزو په مټ يې په ٤٩ توپونو ٦٨ منډې ترلاسه کړې. همدا راز دياندرا دوتين ٢٠ او ريچا ګهوش ١٠ منډې وکړې.

د سوپر نواس له لوري رادها يادو په زړه پورې توپ اچونه ترسره کړه چې په ٤ اورونو کې يې ١٦ منډې ورکړې او ٥ لوبغاړې يې وسوځولې. همدا راز پونم يادو او ششي کلا سري وردنى ١-١ ويکټ واخيستې.

د ١١٩ منډو هدف په تعقيب کې د سوپر نواس لوبډلې په ټاکلو ٢٠ اورونو کې د ٧ لوبغاړو په سوځېدو ١٠٢ منډې وکړې او د ١٦ منډو په توپير يې په پايلوبه کې ماتې وخوړه.

د دوى له لوري لوبډلمشرې هرمن پريت کور ٣٠، ششي کلا سري وردنى ١٩، تانيا بهاټيه ١٤ او جميمه روډريګوس ١٣ منډې وکړې.

د ټرايل بلېزر له لوري سلما خاتون ٣، ديپتي شرما ٢ او سوفي ايکليسټون ١ ويکټ واخيسته.

د لوبې د غوره لوبغاړې جايزه سمرتي مندانا ته ورکړل شوه او د سياليو د غوره لوبغاړې جايزه سمرتي مندانا ترلاسه کړه.

د يادولو وړ ده چې د هند کرکټ بورډ له لوري هر کال د ښځينه ټي ٢٠ چېلنج سيالۍ هم هر کال د اى پي ايل پر مهال ترسره کېږي. په دې سياليو کې درې لوبډلو برخه درلوده، چې د هند د ښځينه لوبغاړو په ګډون د نړۍ د بېلا بېلو هېوادونو ښځينه لوبغاړو پکې ګډون کړى و. د ليګ لوبو درې سيالۍ ترسره شوې او دوه غوره لوبډلو پايلوبې ته لار پېدا کړه، چې ټرايل بلېزر پايلوبه وګټله.

Loading...

دا هم ولولئ

د رحمان الله ګربز او نوين الحق لوبډلې څلورمه ماتې هم وخوړه

د کنډي ټسکرز په نننۍ لوبه کې افغان لوبغاړي رحمان الله ګربز او نوين الحق …