کورپاڼه / خبرونه / د ملي لوبډلې یو بل لوبغاړی هم غلو لوټلی
ميروېس اشرف، ضيا الرحمان اکبر او شرف الدين اشرف

د ملي لوبډلې یو بل لوبغاړی هم غلو لوټلی

د افغانستان کرکټ ملي لوبډلې لوبغاړي میرویس اشرف وروسته یو بل لوبغاړی هم غلو لوټلی او له کوره يې غلو دوه موټر بیولي.

د ملي لوبډلې لوبغاړي میرویس اشرف څو ورځې وړاندې په یو پوسټ کې لیکلي و، چې د کندوز د شیر خان بندر په لاره غلو ولوټل او هر څه یې ترې یوړل.

اوس تازه د افغانستان ورو توپ اچونکي ضیا الرحمان اکبر ویلي دی، چې غلو یې له کوره دوه موټر بیولي دي.

ضیا الرحمان اکبر په خپله رسمي فیسبوکپاڼه لیکلي دي: ((افغانستانه خدای دې مل شه. غلو دوه موټره زموږ له کوره وړي دي.))

نوموړي له یاد پوسټ وروسته په یو بل پوسټ کې لیکلي دي چې هغه او د کورنۍ نور غړي يې روغ دي او چاته زیان نه دی رسیدلی.

نوموړي په خپلو دواړو پوسټونو کې د ولسمشر لومړی مرستیال امرالله صالح مینشن کړی دی.

د ضیا الرحمان اکبر یاد پوسټ د ملي لوبډلې لوبغاړي شرف الدین اشرف هم خپور کړی دی او ورسره يې لیکلي دي، چې کابل نور د ژوند کولو جوګه نه دی.

هغه وايي، چې د ملي لوبغاړو کورونه هم خوندي نه دي، نو دوی څنګه په خپل هېواد کې ژوند وکړي.

د یادولو وړ ده چې دا په دې وروستیو څو ورځو کې دویمه پېښه ده چې د ملي لوبغاړو سره ترسره شوه.

لومړی میرویس اشرف چې په کندوز کې ژوند کوي، د لارې په سر لوټل شوی دی او اوس د ضیا الرحمان اکبر له کوره موټر غلا شوي دي.

یاده دې وي چې ۲۲ کلن ضیا الرحمان اکبر که څه هم تراوسه پورې د ملي لوبډلې لپاره کومه نړیواله لوبه نه ده ترسره کړې، خو هغه د افغانستان الف، افغانستان ایمرجینګ او افغانستان ۱۹ کلنو کم عمره ځوانانو لوبډلو کې لوبېدلی دی.

د دې تر څنګ نوموړي د چټوګرام چېلنجرز، امو زون، مس عینک اتلان او مس عینک زون لپاره هم لوبې کړي دي.

Loading...

دا هم ولولئ

نوين الحق او شاهد اپريدى

“درناوى وکړه، درناوى به دې وشي” نوين الحق پاکستاني شاهد اپريدي ته غاښ ماتوونکى ځواب ورکړ

د افغانستان کرکټ ملي لوبډلې چټک توپ اچونکي نوين الحق يو ځل بيا پاکستاني لوبغاړي …