کورپاڼه / خبرونه / نيوزيلېنډ: د ٦ پاکستاني لوبغاړو د کورونا ټېسټونه مثبت راغلي
پاکستان ملي لوبډله

نيوزيلېنډ: د ٦ پاکستاني لوبغاړو د کورونا ټېسټونه مثبت راغلي

په نيوزيلېنډ کې د پاکستان کرکټ ملي لوبډلې د ٦ لوبغاړو د کورونا ټېسټونه مثبت راغلي دي او د روغتيايي مسوولينو له لوري پاکستاني لوبغاړو ته اخطار هم ورکړل شوى دى.

په راپورونو کې ويل شوي دي، چې د نيوزيلېنډ روغتيايي مسوولين وايي، چې پاکستاني لوبغاړي احتياطي تدابير په سمه توګه نه پلي کوي او په لومړي سر کې د شپږ لوبغاړو د کورونا ټېسټونه مثبت راغلي دي.

د روغتيايي مسوولينو مشر اشلى بلومفيلډ له رسنيو سره په خبرو کې ويلي دي، چې پاکستاني لوبغاړي د کورونا احتياطي تدابير نه عملي کوي او دا ښه کار نه دى.

هغه وايي، چې د شپږ لوبغاړو د کورونا ټېسټونه مثبت راغلي دي او موږ له پاکستاني لوري څخه غوښتنه کړې ده چې په سمه توګه دې احتياطي تدابير تعقيب کړي.

روغتيايي مسوولينو ويلي دي، چې دوى د څارونکو کمرو له لارې وليدل، چې لوبغاړي ټولنيز واټن نه ساتي او داسې ګرځي، لکه د کورونا په نوم چې هېڅ نه وي.

که څه هم د لوبغاړو نومونه دي څرګند شوي، چې د کومو لوبغاړو د کورونا ټېسټونه مثبت راغلي دي، خو نيوزيلېنډ ته د پاکستان ٥٣ لوبغاړي تللي دي، چې د هغوى له ډلې يې د ٦ لوبغاړو د کورونا ټېسټونه مثبت راغلي دي.

د پاکستان لوبډله دوه ورځې وړاندې نيوزيلېنډ ته تللې ده، چې اوس هلته کرنټين دي. همدا راز د پاکستان کرکټ ملي لوبډلې پيليز توپوهونکى فخر زمان، چې له تګ څخه مخکې پکې د کورونا نښې ښکاره شوې وې، له ياد سفر څخه پاتې او سياليو څخه بهر شو.

ياده دې وي چې د پاکستان او نيوزيلېنډ ترمنځ د ٣ نړيوالو شل اوريزو او ٢ ټېسټ لوبو لوبلړۍ ترسره کېږي. دا سيالۍ به د دسمبر په ١٨مه نېټه په اکلېنډ کې پيل شي.

دا هم ولولئ

محمد نبي: په نړیوال شل اوریز جام کې به لوبډلمشري یوه ستونزمنه کړنه وي، خو زه ورته لېواله یم

محمد نبي منلې ده چې په نړیوال شل اوریز جام کې به لوبډلمشري یوه ستونزمنه …