خپلواک افغانستان، سياست، هنر، کرکټ، ساينس او ژوند khpalwak khpalwaak خپلواک
که چېرته تاسې غواړئ چې خپله څېره مو په يو چا وپلورئ، نو په جاپان کې يو شرکت داسې دى، چې هغه د خلکو څېرې اخلي.
په ټوکيو کې يو شرکت چې ماسکونه جوړوي، د سټور کيمينيا اوموټو په نوم دى، چې د خلکو څخه د هغوى د څېرو حقوق اخلي او له هغه وروسته د دوى د څېرو هايپر ريليسټک 3D څېرې جوړوي او بېرته يې په نورو خلکو پلوري.
ياد شرکت چې له کله راهيسې د خلکو د څېرو د حقوقو اخيستلو په اړه اعلان کړى دى، له هغه وروسته دا چاره په خلکو کې ډېره مشهوره شوې ده.
ياد شرکت وايي، چې دوى لومړى د يو چا د څېرې حقوق اخلي، بيا په هايپر ريليسټک ډول د دې څېرو 3D پرنټ اخلي او له جوړولو وروسته يې بيا په ٩٤٠ امريکايي ډالر بېرته پلوري.
د شرکت مسوولين وايي، که د يو چا د څېرې ماسک په خلکو کې مشهور شو او شرکت ته يې ډېره ګټه ورسوله، نو ياد کس ته به د دې ګټې يو سلنه برخه هم ورکړل شي.
د دې پروژې هدف څه دى؟
د دېټ فېس (That Face) په نوم د دې پروژې هدف دا دى چې د خلکو څېرې واخيستل شي او هغوى ته خيالي يا ساينس فکشن بڼه ورکړي، په دې پروژه کې د هغه کسانو چې عمرونه يې له ٢٠ کالو څخه پورته وي او په ټوکيو کې ژوند کوي، د خپلې څېرې د حقونو پلورلو لپاره ياد شرکت سره اړيکه نيولى شي، چې شرکت به د دوى شناخت پټ ساتي.
د ماسک جوړولو دغه شرکت وايي، چې دوى د هيچا شخصي معلومات بل چاته نه ورکوي او د دوى ټول معلومات به له دغه شرکت سره په خوندي ډول پارته وي.
شرکت د څېرو انتخاب د پچې له لارې وکړ
په يو داسې وخت کې چې د شخصي معلوماتو او پرايويسي اهميت د پخوا په پرتله بېخي ډېر شوى دى، د پېسو په بدل کې د خپلې څېرې د حقونو خرڅول يو ډېر جالب کار دى، خو کيمينيا اوموټو شرکت وايي، چې د دوى دا وړانديز تېره مياشت ډېر په خلکو کې مشهور شوى دى.
د دې شرکت د څېرو د حقونو اخيستلو اعلان په پيل کې يوازې د ټوکيو پورې و، خو وروسته په دې چاره کې د خلکو علاقه دومره زياته شوه، چې شرکت دې ته مجبوره شو چې د څېرو انتخاب د پچې له لارې وکړي.
دغه شرکت وايي، چې خيالي يا ساينس فکشن کيسو اوس حقيقت خپل کړى دى، او تراوسه پورې چاته نه ده معلومه، چې د يو ډول څېرو سره به په نړۍ کې د خلکو څه حال وي.
دغه شرکت وايي، چې موږ ستاسې څېرې اخلو هم او هغه بېرته په نورو خلکو پلورو هم.
د يادولو وړ ده چې کيمينيا اوموټو د جاپان لومړنى شرکت نه دى چې د خلکو د څېرو حقوق اخلي او بېرته يې پلوري، بلکې تر دې مخکې په ٢٠١١ کال کې هم د REAL-f په نوم شرکت د پېسو په بدل کې د خلکو د څېرو د 3D ماسک جوړولو او پلورلو کار کړى و.
