د انډرويډ ١١ اپليکېشنونه خطرناک وبلل شو

هغه کسان چې د انډرويډ سيسټم موبايلونه کاروي، د ټېکنالوژۍ پوهانو هغوى ته خبردارى ورکړى دى چې ١١ اپليکېشنونه خطرناک دي.

د برېتانيې د مشهورې وبپاڼې (ميرر) د راپور په وېنا، د ټېکنالوژۍ پوهان چې د نا خوندي اپليکېشنونو په تړاو ژور نظر ساتي، د انډرويډ موبايل کاروونکو ته يې خبردارى ورکړى دى، چې ځينې مشهور اپليکېشنونه د هغوى لپاره خطرناک ثابتېدى شي.

د ټېکنالوژۍ پوهان وايي، چې په دې اپليکېشنونو کې د موادو د خونديتوب په برخه کې خامۍ دي، چې هيکران د دې اپليکېشنونو په مرسته ستاسې موبايلونه هيک کولاى شي.

په راپور کې راغلي دي، چې د ټېکنالوژۍ پوهان وايي چې هيکران ستاسې په موبايل کې استعمال شوي پاسورډونه د دې اپليکېشنونو په مرسته ترلاسه کولاى شي او ستاسو اکاونټونو ته لاسرسى پېدا کولاى شي.

د ټېکنالوژۍ پوهان وايي، چې په دې اپليکېشنونو کې يو سيسټم دى چې CVE-2020-8913 ورته ويل کېږي، دا سيسټم په سمه توګه نه دى تيار شوى، نو ځکه د کاروونکو ډاټا په خطر کې ده.

په راپور کې راغلي دي، چې هيکران نه يوازې دا چې د دې اپليکېشنونو په مرسته ستاسو اکاونټونو ته لاسرسى پېدا کولاى شي، بلکې ستاسې د موبايلونو پېغامونو، زنګونو، عکسونو او ويډيوګانو ته هم لاسرسى پېدا کوي.

دا اپليکېشنونه چې د ټېکنالوژۍ پوهانو په ګوته کړل، نو له هغه وروسته ګوګل هم په دې اړه ګامونه پورته کړي دي او د ډېرى خلکو ډاټا يې خوندي کړې ده.

ياد اپليکېشنونه په لاندې ډول دي:

وايبر Viber

بوکنګ Booking

سيسکو ټيمز Cisco Teams

ينګ پرو Yang Pro

موويټ Moovit

ګرينډر Grindr

اوکى کپيډ Ok Cupid

بمبل Bumble

ايج Edge

ايکس ريکارډر Xrecorder

پاور ډايريکټر PowerDirector

که تاسې هم په دې پورته اپليکېشنونو کې کوم يو په خپل ځيرک انډرويډ موبايل کې لرئ، نو مخکې له دې چې هيکران ستاسې موبايل ته لاسرسى پېدا کړي، دا اپليکېشنونه مو له خپلو موبايلونو څخه ليرې کړئ.