کورپاڼه / د لوبو راپورونه / نيوزيلېنډ په دويمه ټېسټ لوبه کې هم ويسټ انډيز له شرموونکې ماتې سره مخ کړه
ويسټ انډيز او نيوزيلېنډ

نيوزيلېنډ په دويمه ټېسټ لوبه کې هم ويسټ انډيز له شرموونکې ماتې سره مخ کړه

نيوزيلېنډ د لومړۍ ټېسټ لوبې په څېر په دويمه ټېسټ لوبه کې هم د ويسټ انډيز لوبډلې ته د پاڼۍ په سر ماتې ورکړه او د ٢ ټېسټ لوبو لړۍ کې يې بريا خپله کړه.

د نيوزيلېنډ او ويسټ انډيز ترمنځ دويمه ټېسټ لوبه د دسمبر په ١١مه نېټه په ويلنګټن کې پيل شوې وه، چې نن پاى ته ورسېده. د لوبې په پيل کې ويسټ انډيز پچه ګټلې وه او لومړى يې نيوزيلېنډۍ لوبډلې ته د توپوهنې بلنه ورکړې وه.

نيوزيلېنډ په لومړۍ پاڼۍ کې د ټولو لوبغاړو په سوځېدو ٤٦٠ منډې وکړې، چې له ډلې يې هينري نيکولاس ١٧٤، نيل واګنر ٦٦ ناسوځېدلې، ويل ينګ ٤٣ او ډاريل مچل ٤٢ منډې وکړې.

د ويسټ انډيز له لوري شانن ګبريل او الزاري جوسيپ ٣-٣، چيمار هولډر او روسټون چيس بيا ٢-٢ ويکټې ترلاسه کړې.

خو ويسټ انډيز يې په ځواب کې په لومړۍ پاڼۍ کې په ١٣١ منډو وسوځېده، چې جرمين بلېک ووډ پکې زياتې ٦٩ منډې ترلاسه کړې.

د نيوزيلېنډ له لوري ټيم ساوټي او کيلي جېميسون په زړه پورې توپ اچونه ترسره کړه چې دواړو ٥-٥ لوبغاړي وسوځول.

د ويسټ انډيز لوبډله له فالو ان سره مخ شوه او دويمه پاڼۍ يې هم پيل کړه.

په دويمه پاڼۍ کې ويسټ انډيز د ټولو لوبغاړو په سوځېدو ٣١٧ منډې وکړې، چې بيا يې هم د نيوزيلېنډ د لومړۍ پاڼۍ منډې پوره نه کړې او په دې سره يې په يوه پاڼۍ او ١٢ منډو په لوبه کې ماتې وخوړه.

د ويسټ انډيز لپاره په دويمه پاڼۍ کې جان کېمبل ٦٨، جېسن هولډر ٦١، جوشوا دا سلوا ٥٧ او شماره بروکس ٣٦ منډې وکړې.

د نيوزيلېنډ له لوري نيل واګنر او ټرينټ بولټ ٣-٣، ټيم ساوټي او کېلي جيميسون ٢-٢ لوبغاړي وسوځول.

نيوزيلېنډ

د لوبې د غوره لوبغاړي جايزه هينري نيکولاس ترلاسه کړه او د لوبلړۍ د غوره لوبغاړي جايزه کيلي جېميسون ته ورکړل شوه.

نيوزيلېنډ په لومړۍ ټېسټ لوبه کې هم د يوې پاڼۍ او ١٣٤ منډو په توپير ويسټ انډيز ته ماتې ورکړې وه، چې په دويمه لوبه کې يې هم د يوې پاڼۍ او ١٢ منډو په توپير ماتې ورکړه او له دې سره يې لوبلړۍ هم په خپل نوم کړه.

Loading...

دا هم ولولئ

اسټراليا

اسټراليا د ٦٤ منډو په توپير د نيوزيلېنډ لوبډله ماته کړه

د اسټراليا او نيوزيلېنډ ترمنځ په دريمه نړيواله شل اوريزه لوبه کې اسټراليا ښه توپ …