خپلواک افغانستان، سياست، هنر، کرکټ، ساينس او ژوند khpalwak khpalwaak خپلواک
٢٠٢٠ کال پاى ته ورسېد او له ځان سره يې ځينې ښه او ځينې بد يادونه پرېښودل، چې ښايي تر ډېره زموږ په ذهنونو کې پراته وي.
هسې خو د کورونا له امله ٢٠٢٠ کال ډېر سخت او تاواني کال و، خو بيا هم خلکو چې د تفريح لپاره وخت پېدا کړى دى، نو له هغې څخه يې پوره ګټه اخيستې ده.
په ٢٠٢٠ کال کې هم د ځينو پېښو او کيسو انځورونه کېمرو خوندي ساتلي دي، دلته هم موږ ستاسې لپاره د ٢٠٢٠ کال ځينې په زړه پورې عکسونه راغونډ کړي دي.
د جاپان په پلازمېنه ټوکيو کې ځايي خلک د خپلې عقيدې سره سم د روح د پاکوالي او د خوشبختۍ لپاره په کلنۍ مېله کې په يخو اوبو لامبي او د نوي کال جشن لمانځي. په جاپانيانو کې دا کار له ډېر وخت راهيسې رواج دى.
د جاپان په اوکاياما کې نيمه لوڅ کسان د لښتې د نيولو هڅه کوي، دا لوبه چې هر کال کېږي، پکې پادري يوه لښته د خلکو منځ ته ورغورځوي او هر چا چې دا لښته ونيوله، هغه د کال تر ټولو خوشبخته کس ګڼل کېږي.
د مصر په ښکلې سيمه اسوان کې د نيل سمندر په غاړه يو سړى د خپل اوښ سره مستي کوي.
د هند په پلازمېنه نوي ډيلي کې يو کس د هندوانو د عقيدې سره سم د يمراج بڼه خپله کړې ده او خلکو ته د کورونا ويروس د احتياطي تدابيرو خپلو لارښوونه کوي.
په بيلاروس کې يو سړي له موټر څخه ټانګه جوړه کړې ده، هغه يو موټر د اس شاته تړلى دى، چې بيټري، ګروپونه او د موټرو نور شيان يې هم پکې لګولي دي.
په فرانسه کې چې کله د ګرځبندېز نرمېدو وروسته سينماګانې پرانيستل شوې، نو د فلم کتونکو په منځ منځ کې ځينې کارټونان هم ايښودل شوي و، تر څو ټولنيز واټن وساتل شي.
په سپېن کې د کورونا ويروس له امله د غوايانو د منډې کلنۍ مېله وځنډېدله، په همدې پار يو سړي د يو دوکان مخې ته د غوايانو د مجسمو سره داسې عکس اخيستى دى، چې په لومړي نظر ليدو پرې د رښتيا ګمان کېږي.
د برېتانيې د ډوور ښار د سمندر په غاړه يو مارغه ماسک په خوله کې نيولى دى، دا ښايي دا پېغام ورکړي چې انسانان دې د ماسک اهميت درک کړي.
د وېتنام ٩٢ کلن سړى خپل ١٦ فوټه اوږدو ويښتانو سره د عکس اخيستو پر مهال. دې سړي له تېرو ٨٠ کلونو راهيسې خپل ويښتان نه دي واړه کړي.
د ايټاليې په ساحلي سيمه کې د امنيت لپاره ګمارل شوې ښځه د تمريناتو پر مهال له سپو سره منډې وهي.
په مېکسيکو کې د خپلو غوښتنو لپاره احتجاج کوونکي ټېکسي وانان په ځانګړي ډول احتجاج کوي، چې يو ټېکسي ډرايور چې د سپايډرمېن بڼه يې خپله کړې ده، د ټېکسي سره خپه ناست دى.
د روسيې په پلازمېنه ماسکو کې يو سپى په يو ځايي پارک کې د سکېټ بورډ سره لوبې کوي.
