د محمد نبي زبردسته توپوهنه، لوبډله يې بریالۍ او غوره لوبغاړی شو

محمد نبي نن په بیګ باش لیګ کې زبردسته توپوهنه ترسره کړه چې ډېر وروسته يې خپلې لوبډلې ته بریا ورپه برخه کړه او همدا راز د لوبې د غوره لوبغاړي جایزه يې هم ترلاسه کړه.

د بیګ باش لیګ ۳۳مه لوبه د اډیلیډ سټرایکرز او میلبورن رینیګاډز لوبډلو ترمنځ ترسره شوه. د لوبې په پیل کې سټرایکرز پچه وګټله او توپوهنه يې غوره کړه.

اډیلیډ سټرایکرز په ټاکلو ۲۰ اورونو کې د ۷ لوبغاړو په سوځېدو ۱۷۷ منډې وکړې، چې له ډلې یې پیل سالټ ۵۹، الیکس کیري ۴۲ او مټ رینشا ۳۰ منډې وکړې.

راشد خان بیا په صفر وسوځېده.

د میلبورن رینیګاډز له لوري پیټر هیتزګلو ۳ او جېک پریستویج ۲ لوبغاړي وسوځول. نور احمد ۴ اورونو کې ۳۵ او محمد نبي ۱ اور کې ۹ منډې ورکړې، خو ویکټ يې وانخیسته.

د ۱۷۸ منډو هدف د میلبورن رینیګاډز لوبډلې په ۱۹.۵ اورونو کې د ۴ لوبغاړو په سوځېدو پوره کړ او د ۶ ویکټو په توپیر يې بریا خپله کړه. محمد نبي نن په زړه پورې لوبه ترسره او لوبډله يې بریالۍ کړه، هغه د ۲ شپږیزو او ۹ څلوریزو په مټ په ۴۱ توپونو ۷۱ ناسوځېدلې منډې وکړې.

د اډیلیډ سټرایکرز له لوري راشد خان دوه لوبغاړي وسوځول.

د لوبې د غوره لوبغاړي جایزه محمد نبي ته ورکړل شوه.

د یادولو وړ ده چې دا د میلبورن رینیګاډز ۹مه لوبه وه چې دویمه بریا يې خپله کړه.