خپلواک افغانستان، سياست، هنر، کرکټ، ساينس او ژوند khpalwak khpalwaak خپلواک
هسې خو ويل کېږي چې په پېسو څوک خوشحالي نه شي اخيستلى، خو څېړنپوهانو په يوه نوې څېړنه کې ويلي دي، چې د پېسو زياتېدو سره د انسان د خوشحالۍ کچه هم زياتېږي.
د ميل انلاين وېبپاڼې د راپور په وېنا، د پنسلوانيا پوهنتون څېړونکو په ١ ميليون ٧٢٥ زره او ٩٩٤ امريکايانو باندې يوه څېړنه ترسره کړې ده، چې په پايله کې يې ويل شوي دي، څوک چې څومره ډېر شتمن کېږي، همدومره يې د خوشحالۍ کچه هم زياتېږي.
په دې اړه ويل شوي دي، چې د شتمن کېدو هېڅ حد نه دى معلوم، بلکې د پخوا په څېر چې مو په اقتصادي حالت کې هر څومره ښه والى راځي، دا د انسان د خوشحالۍ سبب کېږي.
د څېړنډلې مشر ډاکټر ميتيو کلينګز ورت وايي: ((زموږ په څېړنه کې دا معلومه شوه، چې د پېسو زياتوالى په خوشحالۍ کې زياتوالى راولي. څنګه چې د يو انسان پېسې زياتېږي، همداسې يې د خوشحالۍ کچه هم پورته کېږي.))
نوموړي همدا راز وويل: ((مخکې په يوه څېړنه کې ويل شوي و، چې په کلني توګه څوک تر ٧٥ زرو زيات ډالر وګټي، نو د انسان د خوشحالۍ کچه زياتېږي، خو زموږ څېړنې دا خبره غلطه ثابته کړه. په اصل کې په پېسو کې چې په هره کچه زياتوالى راځي، نو د خوشحالۍ سبب ګرځي.))
