کورپاڼه / د لوبو راپورونه / بنګله دېش په دويمه لوبه کې هم ويسټ انډيز مات کړ او لوبلړۍ يې هم وګټله
ويسټ انډيز او بنګله دېش

بنګله دېش په دويمه لوبه کې هم ويسټ انډيز مات کړ او لوبلړۍ يې هم وګټله

د بنګله دېش لوبډلې په دويمه نړيواله يو ورځنۍ لوبه کې هم په ډېرې اسانۍ سره د ويسټ انډيز لوبډلې ته ماتې ورکړه او په دې سره يې لوبلړۍ هم په خپل نوم کړه.

د ويسټ انډيز او بنګله دېش ترمنځ دويمه نړيواله يو ورځنۍ لوبه په ډهاکه کې ترسره شوه. د لوبې په پيل کې ويسټ انډيز پچه وګټله او لومړى يې توپوهنه غوره کړه.

ويسټ انډيز په ٤٣.٤ اورونو کې د ټولو لوبغاړو په سوځېدو ١٤٨ منډې وکړې، چې له ډلې يې رومان پاويل ٤١، کيورن اوټلي ٢٤ او نکروماه بونر ٢٠ منډې وکړې.

د بنګله دېش له لوري مهدي حسن ښه توپ اچونه ترسره کړه او ٤ ويکټې يې ترلاسه کړې، مستفيظ الرحمان او شکېب الحسن ٢-٢ لوبغاړي وسوځول.

د ١٤٩ منډو هدف بنګله دېش په ٣٣.٢ اورونو کې د ٣ لوبغاړو په سوځېدو پوره کړ، چې د ٧ ويکټو په توپير يې ويسټ انډيز ته په دويمه لوبه کې هم ماتې ورکړه.

د دوى له لوري تميم اقبال ٥٠، شکېب الحسن ٤٣ ناسوځېدلې او ليتون داس ٢٢ منډې وکړې.

د ويسټ انډيز له لوري رېمون ريفر، جېسن محمد او اکيل حسين ١-١ ويکټ واخيستې.

د لوبې د غوره لوبغاړي جايزه مهدي حسن ترلاسه کړه.

د ٣ نړيوالو يو ورځنيو لوبو لړۍ دويمه لوبه کې هم بنګله دېش بريا خپله کړه او د ٢-٠ سره يې لوبلړۍ هم په خپل نوم کړه.

د بنګله دېش او ويسټ انډيز ترمنځ به دريمه نړيواله يو ورځنۍ لوبه د جنورۍ په ٢٥مه نېټه په چټوګرام کې ترسره شي.

Loading...

دا هم ولولئ

مجيب الرحمان او اکشر پټيل

مجيب الرحمان هم د اکشر پټيل د توپ اچونې ستاينه وکړه

د هند کرکټ ملي لوبډلې توپ اچونکي اکشر پټيل د انګلستان پر وړاندې په دريمه …