کورپاڼه / د لوبو راپورونه / پاکستان له ټېسټ وروسته د شل اوریزو لوبو لړۍ کې هم سویلي افریقا ماته کړه

پاکستان له ټېسټ وروسته د شل اوریزو لوبو لړۍ کې هم سویلي افریقا ماته کړه

پاکستان د درې نړیوالو شل اوریزو لوبو په وروستۍ لوبه کې سویلي افریقا ته ماتې ورکړه او له ټېسټ لوبلړۍ وروسته يې د نړیوالو شل اوریزو لوبو لوبلړۍ هم وګټله.

دا لوبه چې په لاهور کې ترسره شوه، پاکستان پچه وګټله او لومړی يې سویلي افریقا ته د توپوهنې بلنه ورکړه.

سویلي افریقا په ټاکلو ۲۰ اورونو کې د ۸ لوبغاړو په سوځېدو ۱۶۴ منډې وکړې، چې له ډلې يې ډیویډ میلر د ۷ شپږیزو او ۵ څلوریزو په مټ په ۴۵ توپونو ۸۵ ناسوځېدلې منډې وکړې.

د پاکستان له خوا زاهد محمود ۳، محمد نواز او حسن علي ۲-۲ ویکټې واخیستې.

د ۱۶۵ منډو هدف د پاکستان لوبډلې په ۱۸.۴ اورونو کې د ۶ لوبغاړو په سوځېدو پوره کړ او د ۴ ویکټو په توپیر يې په لوبه کې بریا خپله کړه.

د دوی له لوري بابر اعظم ۴۴ او محمد رضوان ۴۲ منډې وکړې.

د سویلي افریقا له لوري تبرېز شمسي ۴ لوبغاړي وسوځول.

د لوبې د غوره لوبغاړي جایزه محمد نواز ترلاسه کړه او د لوبلړۍ د غوره لوبغاړي جایزه محمد رضوان ته ورکړل شوه.

د ۳ نړیوالو شل اوریزو لوبو لړۍ کې پاکستان په ۲-۱ سره بریا خپله کړه. د یادولو وړ ده چې تر دې مخکې پاکستان د ۲ ټېسټ لوبو لړۍ کې هم سویلي افریقا ته په ۲-۰ سره ماتې ورکړې وه.

دا هم ولولئ

شاپور ځدراڼ

شاپور ځدراڼ او حشمت شهیدې هم نورعلي ځدراڼ ته د صبر جمیل غوښتنه کړې

د افغانستان کرکټ ملي لوبډلې د ټیسټ او یوه ورځنیو لوبو لوبډلمشر حشمت شهیدي او …