خپلواک افغانستان، سياست، هنر، کرکټ، ساينس او ژوند khpalwak khpalwaak خپلواک
فلج هغه وخت رامنځته کېږي، کله چې د دماغو کومې برخې ته وینه ونه رسېږي او دماغو ته د اکسیجن د نه رسېدنې په صورت کې هم صحت مندې حجرې له منځه ځي، که څه هم د فلج په اړه فکر کول وېروونکی وي خو تر ټولو اړینه داده که چېرته انسان محتاط واوسي، نو د فلج له حملې څخه ځان ژغورلی شي خو څنګه؟
روغتیایي کارپوهان وایي چې د فلج نښې نښانې لږ تر لږه یوه اوونۍ دمخه څرګندېږي، چې په درملنه سره د فلج حمله کنټرول مومي، له څېړنو معلومه شوې چې د وینې کمښت هم د فلج د حملې سبب کېږي، چې د رګونو کمزوري کېدل یاهم د وینې درېدنه هم ور پکې شامله ده.
راځئ چې د فلج د حملې ځینې نښې نښانې چې دمخه ورڅخه څرګندېږي، ولولو:
د مخ کومه برخه جام کېدل: د لاس یا پښې کومه برخه جام کېدل یا له حرکت لوېدل، چې تر لږ وخته پورې وي.
د سترګو دید اغېزمنېدل: د فلج د حملې له نښو څخه یوه نښه د سترګو دید اغېزمنیدل دي او داسې هم شوني ده چې یو شخص ته هر څه خړ غوندې ښکاره شي یاهم دوه دوه سیوري ورته ښکاره شي.
نیمه بې هوښي: ځینې کسان د فلج له حملې دمخه د نیمه بې هوښۍ احساس هم کوي او داسې فکر کوي چې د پوهېدلو او درک کولو وړتیا ورڅخه چا اخیستې ده.
د ساه اخیستلو ستونزه: روغتیایي کارپوهان وایي چې د ساه اخیستلو ستونزه د ځینو نورو ناروغیو ترڅنګ د فلج له نښو نښانو څخه هم ده.
ایټکۍ کول: په ښځو کې ایټکۍ کول هم د فلج له نښو څخه دي او لس سلنه ښځې له فلج څخه دمخه ایټکۍ کوي.
په سلوک کې بدلون: په دماغي کیفیت کې په هره وجه بدلون راتللی شي خو طبیعي سببونه به ضرور لري، نو که چېرته مو په رویه کې بدلون راغي نو دا هم د فلج له نښو څخه ګڼل کېږي.
زړه بدوالی یا کانګې کول: د دماغو د یوې (Cerebellum) کې د فشار په سبب د زړه بدوالي او سر ګرځېدلو کیفیت رامنځته کېږي او دا ستونزه د هالیوسینشین او د لوړ فشار په سبب هم رامنځته کېږي.
