له رحمت شاه وروسته اصغر افغان دويم توپوهونکى شو چې ستر وياړ يې ترلاسه کړ

د افغانستان کرکټ ملي لوبډلې لوبډلمشر اصغر افغان د افغانستان دويم توپوهونکى شو چې ستر وياړ يې ترلاسه کړ، نوموړي نن د زمبابوې پر وړاندې سليزه ووهله.

اصغر افغان د زمبابوې پر وړاندې په دويمه ټېسټ لوبه کې ښه وځلېده او په ١٢١ توپونو يې ١٠١ منډې وکړې، چې په ټېسټ لوبو کې د افغانستان دويم سليزه وهونکى توپوهونکى شو.

تر دې مخکې رحمت شاه د افغانستان لومړنى توپوهونکى و، چې په ټېسټ لوبو کې يې سليزه وهلې وه. نوموړي دا کارنامه په ٢٠١٩ کال کې د بنګله دېش پر وړاندې ترسره کړې وه.

اصغر افغان تر دې مخکې د ټېسټ لوبو په يوه پاڼۍ کې تر ټولو زياتې ٩٢ منډې ترلاسه کړې وې، چې دا منډې هغه د بنګله دېش پر وړاندې ترسره کړې وې.

افغانستان د زمبابوې پر وړاندې د دويمې ټېسټ لوبې په لومړۍ پاڼۍ کې تراوسه پورې د ٣ لوبغاړو په سوځېدو ٢٩٧ منډې کړې دي، چې اصغر افغان په ١٠١ او حشمت الله شهيدي په ٨٢ منډو ناسوځېدلي ولاړ دي.