کورپاڼه / د لوبو راپورونه / نيوزيلېنډ په شل اوريزه لوبلړۍ کې بنګله دېش ته خطرناکه ماتې ورکړه
فين الين او مارټين ګوپټيل

نيوزيلېنډ په شل اوريزه لوبلړۍ کې بنګله دېش ته خطرناکه ماتې ورکړه

نيوزيلېنډ په دريمه نړيواله شل اوريزه لوبه کې هم زبردسته توپوهنه او توپ اچونه ترسره کړه چې بنګله دېش ته يې ماتې ورکړه او په دې سره يې لوبلړۍ هم د ٣-٠ سره وګټله.

د نيوزيلېنډ او بنګله دېش دريمه نړيواله شل اوريزه لوبه په اکلېنډ کې ترسره شوه، د لوبې په پيل کې بنګله دېش پچه وګټله او لومړى يې نيوزيلېنډ ته د توپوهنې بلنه ورکړه.

لوبه د باران له امله ١٠-١٠ اورونو ته راکمه کړاى شوه.

نيوزيلېنډ په ټاکلو ١٠ اورونو کې د ٤ لوبغاړو په سوځېدو ١٤١ منډې وکړې، چې له ډلې يې فين الين ٧١ او مارټين ګوپټيل ٤٤ منډې وکړې.

د بنګله دېش له خوا تسکين احمد، شوريف السلام او مهدي حسن ١-١ ويکټ واخيستې.

د ١٤٢ منډو هدف په تعقيب کې د بنګله دېش ټوله لوبډله په ٩.٣ اورونو کې د ٧٦ منډو په جوړولو سره وسوځېده او د ٦٥ منډو په ستر توپير يې په لوبه کې ماتې وخوړه.

د دوى له خوا محمد نايم ١٩، مصدق حسېن ١٣ او سوميه سرکار ١٠ منډې وکړې. د نيوزيلېنډ له لوري ټوډ اسټل ٤ او ټيم ساوټي ٣ لوبغاړي وسوځول.

د لوبې د غوره لوبغاړي جايزه فين الين ته ورکړل شوه او د لوبلړۍ د غوره لوبغاړي جايزه ګلين پيليپس ترلاسه کړه.

نيوزيلېنډ د ٣ نړيوالو شل اوريزو لوبو لړۍ کې بنګله دېش ته په ٣-٠ سره ماتې ورکړه.

دا هم ولولئ

میتیو هیډن پر اسټرالیایي لوبغاړو سختې نېوکې کړي دي

میتیو هیډن د پاکستان د سفر پر مهال د اسټرالیا کرکټ لوبډلې د یوه ورځنیو …