کورپاڼه / خپلواک / ګلين ميکسويل د ذهني فشار له امله له کرکټ نه رخصت واخيست
ګلين ميکسويل

ګلين ميکسويل د ذهني فشار له امله له کرکټ نه رخصت واخيست

خپلواک وېبپاڼه (٣١ اکتوبر ٢٠١٩): د اسټراليا کرکټ ملي لوبډلې توپوهونکي ګلين ميکسويل د ذهني فشار او نفسياتي ناروغۍ له امله ناڅاپي له کرکټ لوبو څخه رخصت واخيست.

ګلين ميکسويل د سريلانکا پر وړاندې په دريمه ټېسټ لوبه کې ونه لوبېده او د هغه پر ځاى ډارسي شارټ د اسټراليا کرکټ لوبډلې د شل اوريزې لوبې په نوملړ کې شامل شو.

د ځينو رسنيو د راپورونو په وينا، ښايي چې ګلين ميکسويل د پاکستان پر وړاندې په سياليو کې هم په اسټراليايي لوبډله کې نه وي.

د ګلين ميکسويل د دغه ناڅاپي او لويې پرېکړې نه وروسته د اسټراليا لوبډلې روزونکي جسټن لينګر په خپلو خبرو کې وويل، چې ځينې وخت ډېر لوى لوى لوبغاړي هم د ذهني فشار او ناروغيو ستونزې له خلکو پټوي. هغه همدا راز زياتوي، چې د نفسياتو پوه ته يې ويلي دي چې د ګلين ميکسويل حالت وګوري، هغه به د ذهني ناروغۍ له امله له ګلين ميکسويل سره په اړيه کې وي.

د يادولو ده چې ګلين ميکسويل د سريلانکا پر وړاندې په دويمه شل اوريزه سيالۍ کې په ٢٨ توپونو باندې په زړه پورې ٦٢ منډې وکړې.

٣١ کلن ګلين ميکسويل د اسټراليا لوبډلې د توپوهنې الراونډر دى، چې په ښي لاس توپوهنه او اف بريک توپ اچونه ترسره کوي. هغه په ١١٠ يو ورځنيو سياليو کې د ٣٢.٣٢ په اوسط ٢٨٧٧ منډې کړي دي او همدا راز ٥٠ لوبغاړي يې هم سوځولي دي. په شل اوريزو سياليو کې بيا نوموړي ٦١ لوبې کړي او د ٣٥.٠٢ په اوسط سره يې ١٥٧٦ منډې ترلاسه کړي دي. نوموړي همدا راز په شل اوريزو سياليو کې ٢٦ لوبغاړي هم سوځولي دي.

دا هم ولولئ

آیا د خېټې د درد په سببونو پوهېږئ؟

د خېټې یا معدې درد یوه داسې ستونزه ده چې ډېری خلک پرې اخته کېږي …