کورپاڼه / خبرونه / شرف الدين اشرف او شاهدالله کمال د غني بابا واټر ډيفينډرز لوبډله بريالۍ کړه
شرف الدين اشرف

شرف الدين اشرف او شاهدالله کمال د غني بابا واټر ډيفينډرز لوبډله بريالۍ کړه

په خوست کې په نننۍ شل اوريزه لوبه کې شرف الدين اشرف او شاهد الله کمال د خپلې ښې توپوهنې پر مټ د غني بابا واټر ډيفينډرز لوبډلې ته بريا ورپه برخه کړه.

دا لوبه چې د کمال خان بند د پرانيستې په وياړ په خوست کې ترسره شوه، د غني بابا واټر ډيفينډرز او کمال خان ډېم ډيويلپرز لوبډلو ترمنځ ترسره شوه.

د لوبې په پيل کې د غني بابا واټر ډيفينډرز لوبډلې لوبډلمشر رحمان الله ګربز پچه وګټله او لومړى يې د کمال خان ډېم ډيويلپرز لوبډلې ته د توپوهنې بلنه ورکړه.

کمال خان ډېم ډيويلپرز لوبډلې په ١٨.٥ اورونو کې د ټولو لوبغاړو په سوځېدو ١٣٥ منډې وکړې، چې له ډلې يې اکرام عليخېل ٣٧، سميع الله شينواري ٢٥ او حشمت الله شهيدي ١٦ منډې وکړې.

د غني بابا واټر ډيفينډرز له خوا حسيب الله لکڼوال ٤، ننګيال او شرف الدين اشرف ٢-٢، يوسف ځاځي او قېس احمد ١-١ ويکټ ترلاسه کړې.

د ١٣٦ منډو هدف د غني بابا واټر ډيفينډرز لوبډلې په ١٢ اورونو کې د ٢ لوبغاړو په سوځېدو پوره کړ او د ٨ ويکټو په توپير يې په لوبه کې بريا خپله کړه.

د دوى له خوا شاهد الله کمال ٥٢، شرف الدين اشرف ٥٠ او نجيب الله ځدراڼ ١٩ منډې وکړې.

د کمال خان ډېم ډيويلپرز له خوا سيد احمد شېرزاد ١ ويکټ واخيسته.

د لوبې د غوره لوبغاړي جايزه شرف الدين اشرف ته ورکړل شوه.

دا هم ولولئ

احمد ولي هوتک

احمد ولي هوتک خپله راتلونکې سیالي له دې امله لغوه کړه، چې لوبغاړی د هغه مناسب نه دی

د افغانستان د ازادو سیالیو مشهور لوبغاړي احمد ولي هوتک خپله راتلونکې سیالي له دې …