خړ رنګه لېوان له نن څخه زرګونه کاله دمخه څنګه له ورکېدو څخه وژغورل شول؟

خړ رنګه یا نسواري رنګ لېوان یو له هغه لویو ښکار کوونکو حیواناتو له جملې څخه دي، چې یوولس زره، اوه سوه (۱۱۷۰۰) کاله دمخه د کنګل دورې په وروستیو کې له ورکېدو یا له منځه تللو څخه ژغورل شوي.

دغه لېوان اوسمهال د یوکون په بوریل ځنګل او ټندرا کې ژوند کوي او خوراک یې غرڅه او نور څرېدونکي حیوانات دي.

د یوې نوې څېړنې له مخې معلومه شوې چې ددغه لېوانو د ژغورل کېدو لوی لامل په اصل کې د دوی په خوراکي توکو یا غذا کې بدلون دی یعنې د پخوانیو آسونو پرځای یې د غرڅه او نورو حیواناتو خوراک پیل کړ.

د څېړنې لیکوال لینډري وایي چې دوی د لېوانو د هډوکو، غاښونو او د پوستکي کیمیاوي بېلګې تر څېړنې لاندې نیولي او د خوراک په اړه یې معلومات ترلاسه کړي.

نوموړی زیاتوي چې دغه کیمیاوي بېلګې کولی شي ددې حیواناتو د خوراک ترڅنګ یې د ژوند او مرګ په اړه هم ډېر معلومات ورکړي.