سندرغاړي ګودر ځاځي هم ګډ ژوند پيل کړ

خپلواک وېبپاڼه (٤ نومبر ٢٠١٩): د پښتو ژبې نوي سندرغاړي ګودر ځاځي هم واده وکړ او خپل ګډ ژوند يې پيل کړ، چې په ټولنيزو رسنيو کې ورته ډېرو خلکو مبارکۍ هم ورکړي دي.

ګودر ځاځى يو له هغه پښتو سندرغاړو څخه دى، چې ښې او معياري سندرې وايي، که څه هم ډېر وخت يې په موسيقۍ کې نه کېږي، خو د ښو سندرو په ويلو سره يې ګڼ مينه وال پېدا کړي دي.

نوموړي په خپله يوه وروستۍ مرکه کې ويلي و، چې هر څوک د خپل غوره ژوند لپاره منډې ترړې وهي، خو د هغه هدف د خپل قام او ولس خدمت کول دي.

ګران او ژمن ملګري ګودر ځاځي صاحب
او پتمې میرمنې بي بي ته یې د نوي ژوند مبارکي وایم
د نیک صالح بچیو پلار شې ګرانه وروره …@official0073 pic.twitter.com/Rrr465FabQ

— Javed amirkhail official🎸 (@official0073) November 4, 2019

هغه وايي چې لس سندرې يې ويلي دي، خو هره سندره يې د ولس لپاره يو پېغام لري. نوموړى وايي، چې انسان او هېواد سره يې مينه ده، نو له همدې امله يې ټولې داسې سندرې ويلي دي، چې هېوادوالو ته يو پېغام ولري.

نوموړي همدا راز زياته کړې وه، چې هنرمندان بايد په خپلو سندرو کې خلکو ته پېغام ورکړي، هغه وايي چې ټولې سندرې يې د ملي يووالي پېغام لري.

هغه نه يوازې دا چې په پښتو ژبه سندرې ويلي دي، بلکې په دري کې يې هم سندرې ويلي دي او د (مورې مورې) په نوم سندره يې ډېره مشهوره شوې وه. همدا راز نوموړي په وروستيو کې د ولسمشر غني په تړاو هم يوه سندره (دا وطن دې بې له تا نه شي بابا) ويلې ده، چې خلکو ډېره زياته خوښه کړې ده.

ياده دې وي چې ګودر ځاځي د فريسکا ګودر نيازۍ سره واده کړى دى، چې نن يې په خپله فېسبوکپاڼه کې هم د خپلې مېرمنې نوم ورزيات کړى دى. د هغه په واده کې نامتو سندرغاړي جاوېد اميرخېل هم ګډون کړى و.