کورپاڼه / خپلواک / افغانستان د عمان لوبډله په ۹ ويکټو ماته کړه
افغانستان او عمان

افغانستان د عمان لوبډله په ۹ ويکټو ماته کړه

خپلواک وېبپاڼه (۱۶ نومبر ۲۰۱۹): د افغانستان ايمرجينګ لوبډلې په خپله دويمه لوبه کې د عمان ايمرجينګ لوبډلې ته په ۹ ويکټو ماته ورکړه. د افغانستان له لوري طارق ستانکزي په زړه پورې توپ اچونه او عبدالمالک خطرناکه توپوهنه ترسره کړه او خپله لوبډله يې بريا ته ورسوله.

د ايمرجينګ لوبډلو اسيايي جام کې نن د افغانستان ايمرجينګ او عمان ايمرجينګ لوبډلو ترمنځ لوبه د بنګله دېش په کوکس بازار کې ترسره شوه. د لوبې په پيل کې پچه افغانستان ګټلې وه چې لومړی يې د عمان لوبډلې ته د توپوهنې بلنه ورکړه.

عمان ايمرجينګ لوبډلې په ۴۴ اورونو کې د ټولو لوبغاړو په سوځېدو ۱۵۳ منډې وکړې، چې له ډلې يې جتيندر سينګ ۷۲ زياتې منډې وکړې.

د افغانستان لپاره طارق ستانکزي په زړه پورې توپ اچونه ترسره او د عمان ۴ لوبغاړي يې وسوځول، همدا راز عبدالواسع ۲، نجات مسعود او عظمت الله عمرزي ۱-۱ ويکټ ترلاسه کړه.

د افغانستان ايمرجينګ لوبډلې لپاره عبدالمالک په زړه پورې توپوهنه ترسره کړه چې د عمان له لوري ورکړل شوی هدف يې پوره او افغان لوبډله يې بريالۍ کړه. افغانستان د ۱۵۴ منډو هدف په ۳۰.۵ اورونو کې د ۱ لوبغاړي په سوځېدو پوره کړ او عمان لوبډلې ته يې په ۹ ويکټو ماته ورکړه.

د افغانستان لپاره عبدالمالک ۹۱ ناسوځېدلې، شاهدالله ۳۴ او بهير شاه ۲۴ ناسوځېدلې منډې ترلاسه کړې. د عمان لپاره عاقب الياس ۱ ويکټ واخيسته.

د لوبې د غوره لوبغاړي جايزه طارق ستانکزي ته ورکړل شوه، چې د ۲۹ منډو په بدل کې يې ۴ لوبغاړي سوځولي و.

د يادولو ده چې افغانستان ايمرجينګ لوبډلې خپله لومړۍ لوبه له پاکستان سره ترسره کړې وه، چې پاکستان په ۸ ويکټو بريا خپله کړې وه. همدا راز افغان ايمرجينګ لوبډله به خپله دريمه لوبه د نومبر په ۱۸مه نېټه د سريلانکا ايمرجينګ لوبډلې سره ترسره کړي.

Loading...

دا هم ولولئ

شفيق الله شفق

کرکټ بورډ په شفيق الله شفيق د فساد له امله ٦ کاله بندېز ولګاوه

د افغانستان کرکټ بورډ وايي، چې د ملي لوبډلې په نامتو لوبغاړي شفيق الله شفق …