کورپاڼه / خپلواک / په لومړي ځل د جنوبي افريقا تورپوستې پېغله (د کاينات ملکه) غوره شوه
د ښکلا ملکه

په لومړي ځل د جنوبي افريقا تورپوستې پېغله (د کاينات ملکه) غوره شوه

خپلواک وېبپاڼه (٩ دسمبر ٢٠١٩): که څه هم په تېر وخت کې هم د امريکا په ګډون د نورو هېوادونو تورپوستو پېغلو د ښکلا په نړيوالو مسابقو کې (د کاينات ملکې) جايزې ترلاسه کړي دي، خو دا لومړى ځل دى چې د جنوبي افريقا اوسېدونکې تورپوستې پېغله د (مس يونيورس) يا د کاينات ملکې جايزه ترلاسه کوي.

د جنډر توپير يا جنسيتي توپير پر ضد مبارزه کوونکې (د جنوبي افريقا د ښکلا ملکې) ٢٦ کلنې ززيبني تنزي په اروپايي هېواد جارجيا کې د (مس يونيورس ٢٠١٩) مسابقه وګټله او تاريخ يې جوړ کړ.

د (مس يونيورس ٢٠١٩) په مسابقه کې د هند، جنوبي افريقا، امريکا، برېتانيې، مېکسيکو، پيوټوريکو، هنډراس، وينزويلا، فيلپين، اسټراليا، چين، جاپان او سپېن په ګډون د ٩٠ هېوادونو پېغلو ګډون کړى و.

په (مس يونيورس) مسابقه کې چې کومو پېغلو ګډون کړى و، دغه پېغلو په خپلو خپلو هېوادونو کې د ښکلا مسابقې ګټلې وې يا يې پکې لومړۍ جايزه ترلاسه کړې وه او له هغه وروسته بيا دغه نړيوالې د ښکلا مسابقې ته راغلې وې.

د مس يونيورس مسابقې په مهمه برخه کې د جنوبي افريقا پېغلې د مېکسيکو او پيوټوريکو له پېغلو سره مسابقه ترسره کړه، چې په دغه مسابقه کې د مېکسيکو پېغله ناکامه شوه او دويم مقام يې ترلاسه کړ.

په وروستۍ برخه کې بيا د پيوټو ريکو او جنوبي افريقا پېغلو ترمنځ مسابقه ترسره شوه، چې ډېرى خلکو فکر کاوه چې د پيوټو ريکو ٢٤ کلنه پېغله ميډيسن اينډرسن به دا ځل د (مس يونيورس) مسابقه وګټي، ځکه هغه سپين رنګې وه او لوړ قد يې درلوده، نو ځکه خلکو بريالۍ ګڼلې وه.

د ښکلا ملکه ١

خو په دغه مسابقه کې د جنوبي افريقا ٢٦ کلنې پېغلې ززيبني تنزي د (مس يونيورس ٢٠١٩) ګټونکې وبلل شوه او دغه جايزه يې په خپل نوم کړه.

هغه د خپل هېواد لومړنۍ تورپوستې نجلۍ ده چې دغه مسابقه يې وګټله، تر دې مخکې چې د جنوبي افريقا کومو نجونو دا مسابقې ګټلې وې، هغه ټولې سپين پوستې وې.

د (مس يونيورس ٢٠١٩) د جايزې تر ګټلو مخکې هغې په خپلو خبرو کې ويلي و، چې هغه غواړي چې دا مسابقه وګټي، ځکه چې راتلونکي نسلونه د ښکلا معيارونه لږ په بدل ډول وګوري.

د مس يونيورس جايزه ګټونکې ززيبني تنزي وايي، چې هغې ته د هغې د تور رنګ له امله ښايسته نه ويل کېږي، خو هغه وايي چې له دې خبرې سره اتفاق نه کوي، هغه وايي چې هغې ته دې چانس ورکړل شي، تر څو د ښکلا په اړه پخواني روايتونه مات شي او خلک له نوې زاويې څخه ښکلا ته وګوري.

هغې ته د فليپين پخوانۍ (مس يونيورس) کيتريونا ګرى د ښکلا د ملکې يا مس يونيورس تاج ور په سر کړ.

Loading...

دا هم ولولئ

شفيق الله شفق

کرکټ بورډ په شفيق الله شفيق د فساد له امله ٦ کاله بندېز ولګاوه

د افغانستان کرکټ بورډ وايي، چې د ملي لوبډلې په نامتو لوبغاړي شفيق الله شفق …