کورپاڼه / خپلواک / مجيب ٢ لوبغاړي وسوځول خو لوبډله يې له ماتې ونه ژغورله
کوميلا واريرز لوبډله

مجيب ٢ لوبغاړي وسوځول خو لوبډله يې له ماتې ونه ژغورله

خپلواک وېبپاڼه (٢٣ دسمبر ٢٠١٩): د بنګله دېش تجارتي ليګ کې نن افغان ورو توپ اچونکي مجيب الرحمان په زړه پورې توپ اچونه ترسره او ٢ لوبغاړي يې وسوځول، خو لوبډله يې له ماتې سره مخ شوه.

د بنګله دېش تجارتي ليګ په ١٧مه لوبه کې د کوميلا واريرز او ډهاکه پلاټون لوبډلې مخامخ شوې. په پيل کې د لوبې پچه ډهاکه پلاټون لوبډلې وګټله او لومړى يې د کوميلا واريرز لوبډلې ته د توپوهنې بلنه ورکړه.

کوميلا واريرز په ټاکلو ٢٠ اورونو کې د ٣ لوبغاړو په سوځېدو ١٦٠ منډې وکړې، چې له ډلې يې بهانوکا راجاپکسا ٩٦ ناسوځېدلې او ياسر علي ٣٠ ناسوځېدلې منډې وکړې.

د ډهاکه پلاټون له لوري مهدي حسن ٢ او شاداب خان ١ ويکټ واخيسته.

د ١٦١ منډو هدف د ډهاکه پلاټون لوبډلې په ١٩.٥ اورونو کې د ٥ لوبغاړو په سوځېدو پوره او په ٥ ويکټو يې د کوميلا واريرز لوبډلې ته ماته ورکړه. د دوى له لوري مهدي حسن ٥٩، تميم اقبال ٣٤، مومن الحق ٢٨ ناسوځېدلې او شاهد اپريدي ٢٦ ناسوځېدلې منډې وکړې.

د کوميلا واريرز له لوري مجيب الرحمان په ٤ اورونو کې ٢٢ منډې ورکړې او ٢ ويکټې يې ترلاسه کړې، هغه يو مېډين اور هم ترسره کړ، همدا راز روبي الاسلام روبي، الامين حسېن او سوميه سرکار ١-١ ويکټ ترلاسه کړه.

د لوبې د غوره لوبغاړي جايزه مهدي حسن ترلاسه کړه، چې ٢ لوبغاړي يې وسوځول او ٥٩ منډې يې وکړې او خپله لوبډله يې بريا ته ورسوله.

د يادولو ده چې نن په بيګ باش تجارتي ليګ کې راشد خان هم په زړه پورې توپ اچونه ترسره کړه چې په ٤ اورونو کې يې د ٤٠ منډو په بدل کې ٣ لوبغاړي وسوځول او د هغه لوبډله اډلايډ سټرايکرز بريالۍ شوه.

Loading...

دا هم ولولئ

اصغر افغان، فرهان يوسفزى او ګلبدين نايب

افغانستان کرکټ کې بې حسابه پېسې، شهرت او سفرونه دي چې هر څوک يې غواړي

په کرکټ کې او په خاص ډول د افغانستان کرکټ کې درې شيان زيات دي، …