کورپاڼه / خپلواک / بنګله دېش پاکستان ته: لومړى به شل اوريزې وکړو، بيا به د ټېسټ په اړه خبرې کوو
بنګله دېش او پاکستان

بنګله دېش پاکستان ته: لومړى به شل اوريزې وکړو، بيا به د ټېسټ په اړه خبرې کوو

خپلواک وېبپاڼه (٢٥ دسمبر ٢٠١٩): د بنګله دېش کرکټ بورډ د پاکستان کرکټ بورډ ته ويلي دي، چې لومړى به د شل اوريزو لوبو لوبلړۍ ترسره کړو او له هغه وروسته به بيا د ټېسټ سياليو په اړه پرېکړه وکړو.

د رسنيو د راپورونو په وينا، تر دې مخکې د پاکستان کرکټ بورډ چيرمېن احسان ماني ويلي و، چې له بنګله دېش سره نوره هېڅ بهانه نه ده پاتې شوې، چې د ټېسټ سياليو لپاره پاکستان ته راشي او دلته زموږ سره لوبې وکړي. هغه وويل چې سريلانکا لوبډله پاکستان ته راغله او دلته يې لوبې وکړې، چې دا د هغوى لپاره ښه بېلګه ده. نوموړي همدا راز وويل، چې له دې وروسته به په خپل کوربه توب لوبې په نورو هېوادونو کې نه کوي او که بنګله دېش د ټېسټ سياليو لپاره پاکستان ته نه راځي نو دوى مجبوره دي چې د کرکټ نړيوالې شورا ته لاړ شي.

له هغه وروسته د بنګله دېش کرکټ بورډ مسوولينو ويلي دي، چې دوى به لومړى د شل اوريزو لوبو لوبلړۍ لپاره پاکستان ته لاړ شي او هلته به له پاکستان سره لوبې وکړي، خو د ټېسټ سياليو په اړه به بيا وروسته پرېکړه وکړي، چې پاکستان کې يې ترسره کوي او که نه.

د بنګله دېش کرکټ بورډ مسوولين وايي، چې دوى سره د خپلو لوبغاړو د امنيت غم تر هر څه ډېر دى او پاکستان داسې هېواد نه دى چې دوى په پټو سترګو هلته خپله لوبډله ولېږي.

د بنګله دېش کرکټ بورډ مسوولين وايي، چې پاکستان غواړي په بشپړه توګه نړيوال کرکټ خپل هېواد ته بېرته راستون کړي، خو د هغه په وينا، چې له موږ سره د لوبغاړو تر څنګ د روزنې په برخه کې تر ډېره بهرني کسان دي او له لوبغاړو او بهرنيو روزونکو سره تر مشورو وروسته به دوى پرېکړه کوي چې پاکستان ته د ټېسټ سياليو لپاره تللى شي او که نه.

د يادولو ده چې بنګله دېش او پاکستان لوبډلې به ٣ شل اوريزې لوبې د جنورۍ په ٢٣مه، ٢٥مه او ٢٧مه نېټه ترسره کوي او له هغه وروسته به بيا دواړه لوبډلې ټېسټ سيالۍ هم ترسره کوي.

Loading...

دا هم ولولئ

شفيق الله شفق

کرکټ بورډ په شفيق الله شفيق د فساد له امله ٦ کاله بندېز ولګاوه

د افغانستان کرکټ بورډ وايي، چې د ملي لوبډلې په نامتو لوبغاړي شفيق الله شفق …