کورپاڼه / خپلواک / محمد نبي نن توپان وکړ، خو لوبډله يې بيا هم ناکامه شوه
محمد نبي

محمد نبي نن توپان وکړ، خو لوبډله يې بيا هم ناکامه شوه

خپلواک وېبپاڼه (٢١ جنوري ٢٠٢٠): په بيګ باش کې نن افغان الراونډر محمد نبي توپان وکړ، هغه نه يوازې دا چې ١ ويکټ ترلاسه کړه، بلکې په ٣ توپونو يې ٦٣ منډې وکړې چې ٤ شپږيزې او ٤ څلوريزې يې هم ووهلې، خو لوبډله يې بيا هم له ناکامۍ سره مخ شوه.

د بيګ باش تجارتي ليګ نننۍ لوبه د هوبارټ هوريکنز او ميلبورن رينيګاډز ترمنځ ترسره شوه، د لوبې په پيل کې پچه ميلبورن رينيګاډز لوبډلې وګټله او لومړى يې د هوبارټ هوريکنز لوبډلې ته د توپوهنې بلنه ورکړه.

هوبارټ هوريکنز په ټاکلو ٢٠ اورونو کې د ٣ لوبغاړو په سوځېدو ١٩٠ منډې وکړې، چې له ډلې يې ماکاليسټر رايټ ٧٠ ناسوځېدلې، لوبډلمشر ميتيو وېډ ٦٦ او بين مک ډيرموټ ٣٨ ناسوځېدلې منډې وکړې.

د ميلبورن رينيګاډز له لوري کېمرون بويس ٢ ويکټې ترلاسه کړې او محمد نبي په ٤ اورونو کې د ٢٤ منډو په ورکولو سره ١ ويکټ ترلاسه کړه.

د ١٩١ منډو د هدف پر وړاندې د ميلبورن رينيګاډز له لوري مارکوس حارث په ٢ منډو وسوځېده، خو دويم د پيل توپوهونکي شان مارش ٥٦ منډې وکړې، ورپسې سام هارپر هم په ٦ منډو وسوځېده او بيو ويبسټر ٥٠ منډې ترلاسه کړې، خو محمد نبي چې توپوهنې ته راغى، نو چټکه توپوهنه يې پيل کړه چې د ٤ شپږيزو او ٤ څلوريزو پر مټ يې په ٣٠ توپونو ٦٣ منډې وکړې.

خو ميلبورن رينيګاډز په ټاکلو ٢٠ اورونو کې د ٤ لوبغاړو په سوځېدو ١٨٦ منډې وکړې او په ٤ منډو يې لوبه وبايلله.

د هوبارټ هوريکنز له لوري قېس احمد په ٤ اورونو کې ٢٥ منډې ورکړې او ١ ويکټ يې ترلاسه کړه، همدا راز توماس راجرز، کليو روز او ناتن ايليس هم ١-١ ويکټ واخيسته.

د لوبې د غوره لوبغاړي جايزه ماکاليسټر رايټ ترلاسه کړه، چې د خپلې لوبډلې په بريا کې يې مهم رول ترسره کړ.

Loading...

دا هم ولولئ

اصغر افغان، فرهان يوسفزى او ګلبدين نايب

افغانستان کرکټ کې بې حسابه پېسې، شهرت او سفرونه دي چې هر څوک يې غواړي

په کرکټ کې او په خاص ډول د افغانستان کرکټ کې درې شيان زيات دي، …