کورپاڼه / خپلواک / پاکستان په شل اوريزو لوبو کې خپل لومړى مقام وساته
پاکستان کرکټ ملي لوبډله

پاکستان په شل اوريزو لوبو کې خپل لومړى مقام وساته

خپلواک وېبپاڼه (٢٧ جنوري ٢٠٢٠): د پاکستان او بنګله دېش د درې شل اوريزو لوبو لړۍ دريمه يا وروستۍ لوبه د باران له لامله ترسره نه شوه او په دې سره پاکستان د ٣ شل اوريزو لوبو لړۍ د ٢-٠ سره وګټله چې په شل اوريزو لوبو کې يې خپل لومړى مقام برقرار وساته.

د درې شل اوريزو لوبو لړۍ چې د پاکستان په لاهور کې ترسره شوه، په لومړۍ شل اوريزه لوبه کې بنګله دېش لومړى توپوهنه وکړه او پاکستان ته يې د ١٤٢ منډو هدف وټاکه، چې ياد هدف پاکستان د ٥ لوبغاړو په سوځېدو پوره کړ او لومړۍ لوبه يې په خپل نوم کړه.

په دغه لوبه کې شعېب ملک د ښې توپوهنې له لامله د لوبې د غوره لوبغاړي جايزه ترلاسه کړه.

په دويمه شل اوريزه لوبه کې هم بنګله دېش لومړى توپوهنه وکړه او پاکستان ته يې د ١٣٧ منډو هدف وټاکه، چې ياد هدف پاکستان د ١ لوبغاړي په سوځېدو پوره او په ٩ لوبو يې بريا خپله کړه چې له دې سره يې لوبلړۍ هم په خپل نوم کړه.

په دغه لوبه کې بيا بابر اعظم ښه توپوهنه ترسره کړه او د لوبې د غوره لوبغاړي جايزه يې ترلاسه کړه.

دريمه لوبه چې په لاهور کې ترسره کېده، د باران له لامله ترسره نه شوه او له دې سره د ٣ شل اوريزو لوبو لړۍ کې پاکستان په ٢-٠ سره بريا خپله کړه. د دغه لړۍ د غوره لوبغاړي جايزه بيا بابر اعظم ترلاسه کړه.

که چېرته پاکستان په دغه لړۍ کې يوه لوبه هم بايللې واى، نو پاکستان چې اوس مهال د شل اوريزو لوبو په درجه بندۍ کې لومړى مقام لري، دغه لومړى مقام يې له لاسه ورکاوه، خو پاکستان د يادې لوبلړۍ په بريا سره خپل لومړى مقام وساته.

د يادولو ده چې له دې وروسته پاکستان او هند دوه ټېسټ او يوه يو ورځنۍ لوبه هم ترسره کوي.

دا هم ولولئ

نوی کال ۲۰۲۱ مو مبارک او بختور شه

۲۰۲۰ کال نور د تاریخ برخه شو او نوی کال ۲۰۲۱ پیل شو، چې د …