کورپاڼه / خپلواک / د خپلواکۍ په وياړ کابل کې شل اوريزه لوبه ترسره کېږي
افغان ځوانان او افغان اتلان

د خپلواکۍ په وياړ کابل کې شل اوريزه لوبه ترسره کېږي

د خپلواکۍ بېرته اخيستو د ۱۰۰مې کاليزې په وياړ د کابل په لوبغالي کې شل اوريزه لوبه ترسره کېږي، چې پکې د افغانستان ملي لوبغاړي هم لوبېږي.

د افغانستان کرکټ بورډ د رسنيو څانګې د خبر تر مخه، دغه شل اوريزه لوبه د خپلواکۍ په ورځ په کابل لوبغالي کې ترسره کېږي، چې د افغان ځوانان او افغان اتلان په نومونو د دوه لوبډلو ترمنځ به ترسره شي.

افغانستان کرکټ بورډ چې په خپله رسمي فېسبوکپاڼه په دې اړه خبر خپور کړی، د هغې له مخې د افغان ځوانانو لوبډلې لوبډلمشر به ګلبدین نایب او د افغان اتلانو لوبډلې لوبډلمشر به د ملي لوبډلې اوسنی لوبډلمشر راشد خان وي.

ويل کېږي چې په دغه لوبه کې د ګلبدین نایب او راشد خان تر څنګ نور د ملي لوبډلې لوبغاړي هم لوبېږي، چې د خپلواکۍ په ورځ به هېوادوال خپل اتلان له نږدې څخه د کابل په لوبغالي کې وويني.

ياده لوبه چې د زمري په ۲۸مه نېټه ترسره کېږي، سهار ۹ بجې به پيل شي.

د يادونې وړ ده چې د خپلواکۍ د بېرته ترلاسه کولو سلمه کاليزه په ټول هېواد کې په پراخه کچه نمانځل کېږي. د دغه ورځې نمانځلو لپاره ټول کابل ته ښکلا ورکړل شوې ده، چې نه يوازې په ملي بېرغونو پوښل شوی دی، بلکې د شپې پر مهال سرکونه هم په رڼاګانو ښايسته شوي دي.

همدا راز په ولايتونو کې هم په دولتي او ولسي کچه د خپلواکۍ د سلمې کاليزې نمانځلو لپاره پراخې غونډې نيول شوي دي او په لومړي ځل په دومره لويه کچه د خپلواکۍ ورځ نمانځلی کېږي.

همدا راز د يادونې وړ دا هم ده چې دا ځل به په ننګرهار ولايت کې د خپلواکۍ د سلمې کاليزې په وياړ تر ټولو ستر بېرغ هم پورته شي، چې په افغانستان کې په لومړي ځل دومره ستر بېرغ جوړ شوی دی.

Loading...

دا هم ولولئ

نبي، اصغر او راشد

له کرکټ سره د افغانانو کرکه ولې دومره زياته شوه؟

د افغانستان کرکټ بورډ په شفيق الله شفق باندې د فساد له امله د ٦ …