خپلواک افغانستان، سياست، هنر، کرکټ، ساينس او ژوند khpalwak khpalwaak خپلواک
خپلواک وېبپاڼه (١١ سپتمبر ٢٠١٩): د غازي امان الله خان جام یو ورځنیو سیالیو په لړ کې نن د ننګرهار په غازي امان الله خان لوبغالي کې د سپین غر زون او مس عینک زون ترمنځ لوبه ترسره شوه، چې سپین غر زون پکې په ٧ ويکټو د بند امير لوبډلې ته ماته ورکړه او د غوره لوبغاړي جايزه ناصر خان ترلاسه کړه.
د لوبې په پیل کې پچه سپین غر وګټله او لومړی يې د مس عینک لوبډلې ته د توپوهنې بلنه ورکړه.
د مس عينک لوبډلې له خوا عمران ډېره په زړه پورې توپوهنه ترسره کړه او ١١٥ منډې يې وکړې، همدا راز صدام منګل هم بيا د مس عينک لپاره ښې منډې ترلاسه کړې، چې په ٥٨ منډو وسوځېده. مس عينک زون په ټاکلو پنځوس اورونو کې ٧ لوبغاړي له لاسه ورکړل او ٢٧٧ منډې يې وکړې.
د سپين غر زون لوبډلې عظمت الله عمرزي او باطن شاه ډېره په زړه پورې توپ اچونه ترسره کړه، چې دواړو ٣-٣ لوبغاړي له مېدانه بهر کړل، همدا راز يو ښکار ناصر خان هم وکړ.
د ٢٧٨ منډو هدف د سپين غر لوبډلې ته ډېر اسانه ښکاره شو او ناصر خان او بهير شاه د مس عينک زون توپ اچونکي سخت وټکول، دواړو سليزې ووهلې او خپله لوبډله يې بريا ته ورسوله. د سپين غر زون لوبډلې ټاکلى هدف په ٤٧ اورونو کې پوره او يوازې درې ويکټې يې له لاسه ورکړې.
د دوى له خوا ناصر خان ١٠٥ منډې وکړې او بهير شاه بيا په ١٠٣ منډو ناسوځېدلى پاتې شو. همدا راز د مس عينک زون له خوا يوسف ځاځي، ضيا الرحمان او شمس الرحمان ١-١ لوبغاړى ښکار کړ.
ناصر خان چې ١٠٥ منډې يې کړې وې او همدا راز يوه ويکټ يې هم ترلاسه کړې وه، د نننۍ لوبې غوره لوبغاړى ونومول شو.
