کورپاڼه / خپلواک / د ښځو نړيوال جام: پاکستان د ويسټ انډيز لوبډلې ته ماتې ورکړه
پاکستان ښځينه لوبډله

د ښځو نړيوال جام: پاکستان د ويسټ انډيز لوبډلې ته ماتې ورکړه

خپلواک وېبپاڼه (٢٦ فبروري ٢٠٢٠): د ښځو نړيوال شل اوريز جام کې نن د پاکستان او ويسټ انډيز ښځينه لوبډلو ترمنځ لوبه ترسره شوه، چې پاکستان پکې په اسانۍ بريا خپله کړه.

د کرکټ نړيوالې شورا د ښځو نړيوال شل اوريز جام اتمه لوبه په کانبرا کې ترسره شوه، چې د لوبې په پيل کې ويسټ انډيز پچه وګټله او لومړى يې توپوهنه غوره کړه.

د ويسټ انډيز ښځينه لوبډلې په ټاکلو ٢٠ اورونو کې د ٧ لوبغاړو په سوځېدو ١٢٤ منډې وکړې، چې له ډلې يې لوبډلمشرې سټېفن ټېلر ٤٣، شيمين کېمپبيل ٤٣ او لي ان کربي ١٦ منډې وکړې.

د پاکستان ښځينه لوبډلې له لوري ډيانا بېګ، ايمان انور او ندا ډار ٢-٢ او انعم امين ١ ويکټ واخيسته.

د ١٢٥ منډو هدف د پاکستان ښځينه لوبډلې په ١٨.٢ اورونو کې د ٢ لوبغاړو په سوځېدو پوره کړ او د ٨ ويکټو په توپير يې په نړيوال شل اوريز جام کې لومړۍ بريا خپله کړه.

د پاکستان ښځينه لوبډلې لپاره لوبډلمشرې بسمه معروف ٣٨ ناسوځېدلې، جويريه خان ٣٥، منيبه علي ٢٥ او ندا ډار ١٨ ناسوځېدلې منډې ترلاسه کړې.

د ويسټ انډيز ښځينه لوبډلې له لوري افي فليچر او سټيفن ټېلر ١-١ ويکټ واخيسته.

د لوبې د غوره لوبغاړې جايزه جويريه خان ترلاسه کړه، چې ٣٥ منډې يې کړې وې.

د يادولو ده چې د اى سي سي ښځينه نړيوال شل اوريز جام په لړ کې دا د پاکستان لومړۍ لوبه وه چې بريا يې پکې خپله کړه، همدا راز ويسټ انډيز دويمه لوبه ترسره کړه او لومړۍ ماتې يې وخوړله.

نن د انګلستان او تايلېنډ ښځينه لوبډلو ترمنځ هم لوبه ترسره شوې وه، چې انګلستان پکې د ٩٨ منډو په توپير د تايلېنډ لوبډلې ته ماتې ورکړه.

سبا، د فبرورۍ په ٢٧مه نېټه به د هند او نيوزيلېنډ ښځينه لوبډلو او اسټراليا او بنګله دېش ښځينه لوبډلو ترمنځ په ميلبورن او کانبرا کې لوبې ترسره شي.

Loading...

ليکوال\خبريال: خپلواک

Avatar

دا هم ولولئ

شفيق الله شفق

کرکټ بورډ په شفيق الله شفيق د فساد له امله ٦ کاله بندېز ولګاوه

د افغانستان کرکټ بورډ وايي، چې د ملي لوبډلې په نامتو لوبغاړي شفيق الله شفق …